इराणवर अमेरिकेचे अकराव्या दिवशीही हल्ले सुरूच; लष्करी तळ आणि पायाभूत सुविधांवर जोरदार कारवाई

वॉशिंग्टन: मध्यपूर्वेतील संघर्ष अधिक तीव्र होत असताना अमेरिकेने इराणविरुद्ध सलग अकराव्या रात्रीही मोठी लष्करी कारवाई केली आहे. या मोहिमेत इराणची लष्करी संचालन केंद्रे, नौदलाशी संबंधित क्षमता, विमानतळांवरील विमान निवारा केंद्रे, मानवरहित विमानांचे (ड्रोन) साठे तसेच लष्करी रसद व्यवस्थेशी निगडित महत्त्वाच्या पायाभूत सुविधांवर लक्ष्य साधण्यात आल्याचा दावा अमेरिकेच्या मध्यवर्ती लष्करी कमांडने (CENTCOM) केला आहे.

अमेरिकन लष्कराने प्रसिद्ध केलेल्या निवेदनानुसार, ही कारवाई २१ जुलै रोजी रात्री सुमारे ८.१५ वाजता पूर्ण झाली. होर्मुझ सामुद्रधुनीतून जाणाऱ्या व्यापारी जहाजांना निर्माण होणारा धोका कमी करणे हा या मोहिमेचा प्रमुख उद्देश असल्याचे नमूद करण्यात आले आहे. अमेरिकन लष्कराच्या माहितीनुसार, गेल्या तीन महिन्यांत इराणने होर्मुझ सामुद्रधुनीतून प्रवास करणाऱ्या ३० हून अधिक व्यापारी जहाजांवर हल्ले केले होते. या कारवायांमुळे शेकडो नागरी खलाशांच्या सुरक्षेला धोका निर्माण झाल्याचा आरोपही अमेरिकेने केला आहे.

होर्मुझ सामुद्रधुनावरील नियंत्रणाबाबत अमेरिका आणि इराण यांच्याकडून परस्परविरोधी दावे केले जात असले, तरी व्यापारी जहाजांसाठी हा महत्त्वाचा सागरी मार्ग सुरूच असल्याचे अमेरिकेने स्पष्ट केले आहे. मे महिन्याच्या प्रारंभापासून आतापर्यंत सुमारे ९०० व्यापारी जहाजांना सुरक्षित मार्गदर्शन करण्यात आल्याचा दावा करण्यात आला असून, या मार्गातून अंदाजे ४५ कोटी बॅरल कच्च्या तेलाची वाहतूक झाल्याचेही सांगण्यात आले आहे.

दरम्यान, इराणच्या सरकारी प्रसारमाध्यमांनी अमेरिकन कारवाईनंतर देशातील अनेक भागांमध्ये हवाई हल्ले झाल्याचे वृत्त दिले आहे. इलाम प्रांतातील चामर आणि अब्दानान परिसरात हल्ले झाल्याची माहिती समोर आली आहे. तसेच कुर्दिस्तान प्रांतातील बनेह शहराबाहेरील भागात आणि हमदान प्रांतातील कबुदर आहंग परिसरातही हल्ले झाल्याचे स्थानिक अधिकाऱ्यांनी सांगितले. खुझेस्तान प्रांतातील माहशहर, पूर्व अझरबैजान प्रांतातील तब्रीझ तसेच दक्षिण-पूर्व इराणमधील चाबहार येथे मोठ्या स्फोटांचे आवाज ऐकू आल्याची माहिती समोर आली आहे. या घडामोडींमुळे मध्यपूर्वेतील तणाव आणखी वाढला असून, होर्मुझ सामुद्रधुनीतील सुरक्षा आणि जागतिक तेल पुरवठ्यावर त्याचा गंभीर परिणाम होण्याची शक्यता व्यक्त केली जात आहे.