बीडच्या इमामपूर रोडवर धक्कादायक प्रकार; किरकोळ वादातून ३०-३५ जणांच्या टोळक्याच्या उपस्थितीत गोळीबार, ४ राऊंड फायर

बीड – इमामपूर रोड परिसरात रात्रीच्या सुमारास गोळीबार झाल्याची धक्कादायक घटना समोर आली आहे. किरकोळ कारणावरून झालेल्या वादानंतर हा गोळीबार झाल्याची प्राथमिक माहिती असून या घटनेमुळे परिसरात काही काळ तणावाचे वातावरण निर्माण झाले.

मिळालेल्या माहितीनुसार, या घटनेवेळी सुमारे ३० ते ३५ जणांची टोळी उपस्थित होती. याच वादातून वाल्मिक कराड समर्थक सफान खान याने चार राऊंड फायर केल्याचा आरोप करण्यात आला आहे.

या प्रकरणी चार जणांसह काही अज्ञात आरोपींविरोधात गुन्हा दाखल करण्यात आला आहे. घटनेची माहिती मिळताच बीड पोलिसांनी तपास सुरू केला असून, गोळीबारामागील नेमके कारण आणि घटनेतील आरोपींची भूमिका याबाबत अधिक तपास केला जात आहे.

दरम्यान, या प्रकरणात पोलिसांकडून पुढे कोणती कारवाई केली जाते, आरोपींना अटक होते का आणि गोळीबारासाठी वापरण्यात आलेले शस्त्र जप्त केले जाते का, याकडे आता लक्ष लागले आहे. पोलिसांच्या तपासातून या संपूर्ण घटनेमागील नेमके कारण स्पष्ट होण्याची शक्यता आहे.