के. कविता यांनी ‘तेलंगणा राष्ट्र सेना’ या नव्या पक्षाची घोषणा

हैदराबाद : तेलंगणाच्या राजकीय पटावर मोठी घडामोड घडली असून के. कविता यांनी स्वतंत्र राजकीय पक्ष स्थापन करण्याची घोषणा केली आहे. ‘तेलंगणा राष्ट्र सेना’ असे या नव्या पक्षाचे नाव असून, या निर्णयामुळे राज्याच्या राजकारणात नव्या समीकरणांची चर्चा सुरू झाली आहे. भारत राष्ट्र समितीपासून विभक्त झाल्यानंतर काही महिन्यांतच त्यांनी हा निर्णायक पाऊल उचलत स्वतःची स्वतंत्र राजकीय दिशा स्पष्ट केली आहे.
हैदराबादमध्ये आयोजित करण्यात आलेल्या विशेष कार्यक्रमात त्यांनी पक्षाची अधिकृत घोषणा केली. या वेळी त्यांनी तेलंगणाच्या अस्मितेला आणि जनतेच्या अपेक्षांना केंद्रस्थानी ठेवून राजकारण करण्याचा निर्धार व्यक्त केला. कार्यक्रमापूर्वी त्यांनी 1969 च्या तेलंगणा आंदोलनातील शहीदांना अभिवादन करत आपल्या नव्या राजकीय प्रवासाची सुरुवात केली. या कृतीतून नव्या पक्षाचा मुख्य भर तेलंगणाच्या हक्कांवर, प्रादेशिक ओळखीवर आणि अपूर्ण राहिलेल्या प्रश्‍नांवर राहणार असल्याचे त्यांनी अधोरेखित केले. या घोषणेला विशेष महत्त्व आहे, कारण पूर्वी त्यांच्या वडिलांनी ‘तेलंगणा राष्ट्र समिती’ या नावाने पक्षाची स्थापना केली होती, ज्याचे पुढे ‘भारत राष्ट्र समिती’ असे नामकरण करण्यात आले. आता पुन्हा त्याच नावाशी साधर्म्य असलेले नाव स्वीकारत कविता यांनी वेगळी राजकीय ओळख निर्माण करण्याचा प्रयत्न सुरू केला आहे. यामुळे जुन्या आणि नव्या विचारसरणीतील संघर्षही अधोरेखित होत असल्याचे राजकीय विश्‍लेषकांचे मत आहे. माध्यमांशी बोलताना कविता यांनी स्पष्ट केले की, त्यांनी पक्ष सोडण्याचा निर्णय स्वेच्छेने घेतलेला नसून त्यांना आणि त्यांच्या सहकार्‍यांना बाहेरचा रस्ता दाखवण्यात आला. त्यांच्या मते, पक्षाने मूळ विचारसरणीपासून दूर जात आपल्या धोरणांमध्ये आणि कामकाजात बदल केले, ज्यामुळे जनतेशी असलेले नाते कमकुवत झाले. कोणताही पक्ष आपल्या मूलभूत तत्त्वांपासून दूर गेला, तर त्याचे अस्तित्व टिकणे कठीण होते, असे त्यांनी नमूद केले. भावनिक शब्दांत त्यांनी आपल्या भूमिकेचे स्पष्टीकरण देताना सांगितले की, तेलंगणाच्या जनतेशी असलेले नाते हेच त्यांचे खरे बळ आहे. गेल्या दोन दशकांपासून त्यांनी राज्याच्या प्रश्‍नांसाठी काम केले असून, पुढेही कोणतीही तडजोड न करता जनतेच्या हितासाठी लढा सुरू ठेवणार असल्याचे त्यांनी स्पष्ट केले.

नव्या पक्षामुळे राजकारण ढवळून निघणार
दरम्यान, त्यांच्या आणि भारत राष्ट्र समितीमधील मतभेद मागील वर्षी उघड झाले होते. पक्षविरोधी कारवायांच्या आरोपावरून त्यांच्यावर कारवाई करण्यात आली होती. त्यानंतर त्यांनी काही वरिष्ठ नेत्यांवर गंभीर आरोप करत राजकीय कटकारस्थानाचा मुद्दा उपस्थित केला होता. या पार्श्‍वभूमीवर त्यांनी आपल्या आमदारकीचा राजीनामा देत सक्रिय राजकारणातून काही काळ दूर राहण्याचा निर्णय घेतला होता. यानंतर त्यांनी सामाजिक क्षेत्रात कार्य करत जनतेशी संपर्क कायम ठेवला. आता नव्या पक्षाच्या स्थापनेद्वारे त्यांनी पुन्हा एकदा सक्रिय राजकारणात दमदार पुनरागमन केले आहे. त्यांच्या या निर्णयामुळे तेलंगणाच्या राजकारणात नवीन आघाड्या, नवे संघर्ष आणि बदलते राजकीय गणित पाहायला मिळण्याची शक्यता व्यक्त केली जात आहे.