पंतप्रधान मोदींचा हुगळी नदीत नौकाविहार

कोलकाता : पंतप्रधान नरेंद्र मोदी सध्या पश्‍चिम बंगालच्या दौर्‍यावर असून, त्यांनी आज सकाळी कोलकाता येथे हुगळी नदी मध्ये नौकाविहार करत शांत सकाळीचा अनुभव घेतला. या प्रसंगातील काही छायाचित्रे त्यांनी आपल्या सामाजिक माध्यमांवर शेअर केली आहेत.
या छायाचित्रांमध्ये नदीकाठचे नैसर्गिक सौंदर्य, तसेच शहरातील प्रसिद्ध पूल विद्यासागर सेतू आणि हावडा ब्रिज यांचे जवळून घेतलेले दृश्य दिसून येते. पंतप्रधानांनी या प्रवासादरम्यान छायाचित्रणाचाही आनंद घेतल्याचे नमूद केले आहे. सोशल मीडियावर त्यांनी व्यक्त केलेल्या भावना विशेष लक्षवेधी ठरल्या. त्यांनी लिहिले की, प्रत्येक बंगालीच्या मनात गंगा नदीला अत्यंत महत्त्वाचे स्थान आहे. गंगा ही केवळ नदी नसून, ती संपूर्ण संस्कृतीचे वहन करणारी जीवनरेखा आहे. कोलकात्यातील हुगळी नदीकिनारी काही वेळ घालवताना त्यांनी माता गंगेप्रती कृतज्ञता व्यक्त केल्याचेही सांगितले. या नौकाविहारादरम्यान पंतप्रधानांनी स्थानिक नाविकांशी संवाद साधला, तसेच सकाळी फेरफटका मारण्यासाठी बाहेर पडलेल्या नागरिकांशीही भेट घेतली. या संवादातून त्यांनी स्थानिक जीवनशैलीचा अनुभव घेतला. तसेच, हुगळी नदीच्या तीरावर उभे राहून पश्‍चिम बंगालच्या विकासासाठी आणि बंगाली जनतेच्या प्रगतीसाठी केंद्र सरकारची बांधिलकी पुन्हा अधोरेखित केल्याचे त्यांनी स्पष्ट केले. पंतप्रधानांचा हा साधा पण प्रतीकात्मक कार्यक्रम सामाजिक आणि सांस्कृतिक दृष्टिकोनातून महत्त्वाचा मानला जात आहे.