लग्नपत्रिकेवर जन्मतारीख छापण्याचा निर्णय महत्त्वपूर्ण; सामाजिक कार्यकर्ते डॉ. गावीत्रे यांनी केले स्वागत

कोपरगाव शहर: समाजातील बालविवाह ही एक गंभीर सामाजिक समस्या आहे. कायद्याने मुलींचे विवाहयोग्य वय १८ वर्षे आणि मुलांचे २१ वर्षे निश्चित केले असले तरी काही ठिकाणी अजूनही अल्पवयीन मुला-मुलींचे विवाह होत असल्याचे आढळते. अशा परिस्थितीत लग्नपत्रिकेवर वधू-वरांची जन्मतारीख छापणे बंधनकारक करण्याचा शासनाने घेतलेला निर्णय अत्यंत स्वागतार्ह आणि समाजहिताचा असल्याचे प्रतिपादन सामाजिक कार्यकर्ते डॉ. अशोक गावीत्रे यांनी केले.

राज्य सरकारने घेतलेल्या या निर्णयामुळे विवाहासाठी संबंधित व्यक्तींचे वय सहजपणे तपासता येईल. त्यामुळे बालविवाहाच्या घटना रोखण्यासाठी प्रशासन, समाजसेवक आणि नागरिक यांना मोठी मदत होणार आहे. अनेक वेळा वयाची चुकीची माहिती देऊन किंवा कागदपत्रांमध्ये फेरफार करून बालविवाह करण्याचे प्रयत्न केले जातात, मात्र जन्मतारीख सार्वजनिकरित्या लग्नपत्रिकेवर छापल्यास अशा प्रकारांना पूर्णपणे आळा बसू शकतो.

बालविवाहामुळे मुलींच्या शिक्षणावर परिणाम होतो, त्यांचे आरोग्य धोक्यात येते आणि त्यांचे बालपण हिरावले जाते. तसेच अल्पवयीन वयात विवाह झाल्यामुळे आर्थिक, सामाजिक आणि मानसिक अडचणी निर्माण होण्याची शक्यता वाढते. त्यामुळे बालविवाह निर्मूलनासाठी शासन आणि सामाजिक संस्थांकडून सातत्याने प्रयत्न केले जात आहेत. सरकारचा हा निर्णय नक्कीच कौतुकास्पद असल्याचे डॉ. गावीत्रे यांनी सांगितले. समाजातील प्रत्येकाने या निर्णयाचे स्वागत करून त्याची प्रभावी अंमलबजावणी करण्यासाठी सहकार्य करणे आवश्यक आहे, तरच बालविवाहमुक्त समाज निर्माण करण्यासाठी हा एक सकारात्मक आणि दूरदृष्टीचा निर्णय ठरेल, असे त्यांनी म्हटले आहे.