प. बंगालमध्ये सुवेंदू अधिकारी पर्वाला सुरूवात; मुख्यमंत्री पदाची घेतली शपथ; पंतप्रधान मोदींसह वरिष्ठ नेत्यांची उपस्थिती

कोलकाता : पश्‍चिम बंगालच्या राजकारणात महत्त्वपूर्ण घडामोड घडत भारतीय जनता पक्षाचे नेते सुवेंदू अधिकारी यांनी मुख्यमंत्रीपदाची शपथ घेतली. कोलकाता येथील ब्रिगेड परेड मैदानावर पार पडलेल्या भव्य सोहळ्यात राज्यपाल आर. एन. रवी यांनी त्यांना पद आणि गोपनीयतेची शपथ दिली. या कार्यक्रमाला पंतप्रधान नरेंद्र मोदी, केंद्रीय गृहमंत्री अमित शाह, संरक्षणमंत्री राजनाथ सिंह यांच्यासह विविध राज्यांतील मुख्यमंत्री, केंद्रीय मंत्री आणि पक्षाचे वरिष्ठ नेते उपस्थित होते.
मुख्यमंत्रीपदाची शपथ घेतल्यानंतर सुवेंदू अधिकारी यांच्या मंत्रिमंडळातील इतर पाच सदस्यांनीही मंत्रीपदाची शपथ घेत नव्या सरकारमध्ये प्रवेश केला. मात्र, कोणत्या मंत्र्यांकडे कोणती जबाबदारी दिली जाणार याबाबत अद्याप अधिकृत घोषणा करण्यात आलेली नाही. त्यामुळे खातेवाटपाकडे राजकीय वर्तुळाचे लक्ष लागले आहे. मंत्रिमंडळात सर्वप्रथम ज्येष्ठ नेते दिलीप घोष यांनी शपथ घेतली. पश्‍चिम बंगाल विधानसभा निवडणूक 2021 दरम्यान त्यांनी पक्ष संघटना बळकट करण्यासाठी महत्त्वाची भूमिका निभावली होती. यंदाच्या निवडणुकीतही त्यांनी प्रचारात सक्रिय सहभाग घेतला होता. त्यांच्या अनुभवाचा सरकारच्या कामकाजात उपयोग होईल, अशी चर्चा सुरू आहे.
यानंतर अग्निमित्रा पॉल यांनी मंत्रीपदाची शपथ घेतली. त्या या मंत्रिमंडळातील एकमेव महिला मंत्री ठरल्या आहेत. आसनसोल दक्षिण मतदारसंघातून त्यांनी मोठ्या मताधिक्याने विजय मिळवला होता. प्रचारादरम्यान महिला सक्षमीकरण, रोजगारनिर्मिती आणि औद्योगिक विकास या मुद्द्यांवर त्यांनी विशेष भर दिला होता. त्यामुळे त्यांना महत्त्वाची जबाबदारी मिळण्याची शक्यता व्यक्त केली जात आहे. त्यानंतर अशोक कीर्तनिया यांनी मंत्रीपदाची शपथ घेतली. बोंगाव उत्तर मतदारसंघातून त्यांनी मोठ्या मताधिक्याने विजय मिळवत आपला प्रभाव सिद्ध केला होता. ग्रामीण भागातील संघटनात्मक कार्य आणि स्थानिक प्रश्‍नांवर सातत्याने आवाज उठवल्यामुळे त्यांची ओळख अधिक मजबूत झाली आहे. यानंतर क्षुदीराम टुडू यांनी मंत्रीपदाची शपथ घेतली. राणीबंध मतदारसंघातून त्यांनी मोठ्या मताधिक्याने विजय मिळवला होता. आदिवासी समाजात त्यांचा प्रभाव मानला जात असल्याने ग्रामविकास, आदिवासी विकास किंवा वनविभागाशी संबंधित जबाबदारी त्यांच्याकडे सोपवली जाऊ शकते, अशी चर्चा आहे. शेवटी युवा नेते निसिथ प्रमाणिक यांनी मंत्रीपदाची शपथ घेतली. कूचबिहार जिल्ह्यातील माथाभांगा मतदारसंघातून त्यांनी मोठ्या मताधिक्याने विजय संपादन केला होता. तरुण मतदारांमध्ये त्यांची लोकप्रियता असून पक्षाच्या नव्या नेतृत्वातील महत्त्वाचा चेहरा म्हणून त्यांच्याकडे पाहिले जाते.

मंत्रिमंडळ विस्तार आणि खातेवाटपाकडे लक्ष
ब्रिगेड परेड मैदानावर झालेल्या या शपथविधी सोहळ्यास भाजप कार्यकर्ते आणि समर्थक मोठ्या संख्येने उपस्थित होते. घोषणांनी संपूर्ण परिसर दुमदुमून गेला होता. पंतप्रधान नरेंद्र मोदी यांच्या उपस्थितीमुळे या कार्यक्रमाला राष्ट्रीय पातळीवर विशेष महत्त्व प्राप्त झाले. नव्या सरकारच्या स्थापनेनंतर आता मंत्रिमंडळ विस्तार, खातेवाटप आणि प्रशासनातील बदलांकडे सर्वांचे लक्ष लागले आहे.