तांत्रिक शिक्षणाकडे विद्यार्थ्यांचा वाढता कल; पॉलिटेक्निक प्रवेश प्रक्रियेला वेग

नांदेड: राज्यातील प्रथम वर्ष पदविका अभियांत्रिकी (पॉलिटेक्निक) अभ्यासक्रमांच्या केंद्रीभूत प्रवेश प्रक्रियेला यंदा विद्यार्थ्यांचा उत्स्फूर्त प्रतिसाद मिळत असून तांत्रिक शिक्षणाकडे विद्यार्थ्यांचा वाढता कल स्पष्टपणे दिसून येत आहे. प्रवेश अर्ज सादर करण्याची अंतिम मुदत २ जुलै २०२६ पर्यंत वाढविण्यात आल्याने अद्याप अर्ज न भरलेल्या विद्यार्थ्यांना प्रवेश प्रक्रियेत सहभागी होण्यासाठी आणखी एक संधी उपलब्ध झाली आहे.

संगणक आणि आयटी शाखांना अधिक प्राधान्य

संगणक अभियांत्रिकी, माहिती तंत्रज्ञान, कृत्रिम बुद्धिमत्ता (AI) आणि डिजिटल तंत्रज्ञानाशी संबंधित शाखांकडे विद्यार्थ्यांचा ओढा वाढत असल्याचे यंदाच्या प्रवेश प्रक्रियेत दिसून येत आहे. बदलत्या तंत्रज्ञान युगात आयटी क्षेत्रातील वाढत्या रोजगाराच्या संधी, स्टार्टअप संस्कृतीचा विस्तार आणि जागतिक स्तरावरील डिजिटल क्रांतीमुळे विद्यार्थी व पालक या शाखांना अधिक प्राधान्य देत आहेत.

पारंपरिक शाखांची मागणीही कायम

आधुनिक शाखांसोबतच सिव्हिल, मेकॅनिकल आणि इलेक्ट्रिकल यांसारख्या पारंपरिक अभियांत्रिकी शाखांनाही विद्यार्थ्यांकडून चांगला प्रतिसाद मिळत आहे. पायाभूत सुविधा विकास, बांधकाम क्षेत्रातील वाढती कामे, उत्पादन उद्योगांचा विस्तार तसेच ऊर्जा क्षेत्रातील रोजगाराच्या संधी यामुळे या शाखांची मागणी कायम असल्याचे तज्ज्ञांचे मत आहे. पॉलिटेक्निक शिक्षण हे विद्यार्थ्यांना कमी कालावधीत तांत्रिक ज्ञान, व्यावहारिक कौशल्य आणि उद्योगाभिमुख प्रशिक्षण देणारे महत्त्वाचे माध्यम मानले जाते. पदविका अभ्यासक्रम पूर्ण केल्यानंतर विद्यार्थ्यांना थेट अभियांत्रिकी पदवीच्या द्वितीय वर्षात प्रवेश घेण्याची संधी उपलब्ध होत असल्याने दहावी आणि बारावीनंतर करिअर घडविण्यासाठी पॉलिटेक्निक हा प्रभावी पर्याय ठरत आहे.

२ जुलै २०२६ पूर्वी अर्ज करण्याचे आवाहन

प्रवेशासाठी मुदतवाढ मिळाल्याने इच्छुक विद्यार्थ्यांनी आवश्यक कागदपत्रांसह २ जुलै २०२६ पूर्वी अर्ज प्रक्रिया पूर्ण करावी, असे आवाहन इंदिरा इन्स्टिट्यूट ऑफ टेक्नॉलॉजी पॉलिटेक्निक, विष्णुपुरीचे प्राचार्य डॉ. ईशान अग्रवाल यांनी केले आहे. डॉ. अग्रवाल म्हणाले की, तंत्रज्ञानाच्या झपाट्याने होत असलेल्या प्रगतीमुळे संगणक व आयटी शाखांकडे कल वाढत असला, तरी उद्योग क्षेत्रातील सातत्यपूर्ण मागणीमुळे पारंपरिक शाखांनाही चांगला प्रतिसाद मिळत आहे. दोन्ही क्षेत्रांत उच्च शिक्षण आणि रोजगाराच्या भरपूर संधी उपलब्ध असल्याने विद्यार्थ्यांनी आपल्या आवडी, क्षमता आणि भविष्यातील करिअरच्या उद्दिष्टांचा विचार करून योग्य शाखेची निवड करावी.