सुयोग किड्ज़ अँड इंटरनॅशनल स्कूलमध्ये निःशुल्क ध्यान कार्यशाळेला उत्स्फूर्त प्रतिसाद

नांदेड : शहरातील बोरबन भागात असणार्‍या सुयोग किड्ज़ अँड इंटरनॅशनल स्कूलमध्ये विद्यार्थ्यांसाठी आयोजित करण्यात आलेल्या निःशुल्क ध्यान कार्यशाळेला विद्यार्थ्यांसह पालकांकडून उत्स्फूर्त प्रतिसाद मिळाला. विद्यार्थ्यांच्या मानसिक विकासाला चालना देणे, एकाग्रता वाढविणे आणि अंतर्मनातील शांततेचा अनुभव देणे हा या उपक्रमामागील प्रमुख उद्देश होता.या ध्यान शिबिराचे आयोजन शाळेच्या प्राचार्या डॉ. अमन बरारा आणि संचालक जयेन्द्र बरारा यांच्या वतीने करण्यात आले होते.
ही कार्यशाळा झूम मीटच्या माध्यमातून ऑनलाईन पद्धतीने पार पडली. या सत्राचे मार्गदर्शन प्रख्यात ध्यानमार्गदर्शक गुरुदेव राजिंदर सिंह यांनी केले. ते महावतार बाबा जी यांचे प्रत्यक्ष शिष्य मानले जातात. त्यांच्या सोप्या, प्रभावी आणि संवादात्मक मार्गदर्शनामुळे विद्यार्थ्यांना ध्यान प्रक्रियेचे महत्त्व सहज समजले. सत्रादरम्यान विद्यार्थ्यांनी ध्यानाच्या विविध टप्प्यांचा अनुभव घेत आत्मविश्वास, मानसिक स्थैर्य आणि सकारात्मक ऊर्जा यांची अनुभूती घेतली. आजच्या स्पर्धात्मक आणि तणावपूर्ण वातावरणात विद्यार्थ्यांवर वाढत असलेल्या मानसिक दडपणाच्या पार्श्वभूमीवर अशा प्रकारच्या कार्यशाळा अत्यंत उपयुक्त ठरत असल्याचे पालकांनी नमूद केले. कार्यशाळेनंतर अनेक पालकांनी शाळा प्रशासनाशी संपर्क साधत या उपक्रमाचे कौतुक केले. तसेच अशा कार्यशाळा सातत्याने आयोजित करण्याची मागणीही व्यक्त केली. पालकांच्या या सकारात्मक प्रतिसादाची दखल घेत गुरुदेव राजिंदर सिंह लवकरच प्रौढांसाठीही ध्यान कार्यशाळा आयोजित करणार असल्याची माहिती देण्यात आली. या ध्यानपद्धतीचा संबंध क्रिया योगाशी असून, ती मन:शांती, तणावमुक्ती आणि आत्मिक संतुलन साधण्यासाठी उपयुक्त ठरली. एकूणच, सुयोग किड्ज़ अँड इंटरनॅशनल स्कूलचा हा उपक्रम विद्यार्थ्यांच्या सर्वांगीण विकासासाठी प्रेरणादायी ठरत असून शिक्षणाबरोबरच मानसिक स्वास्थ्यालाही समान महत्त्व देण्याचा सकारात्मक संदेश देत आहे.