खासदार सुप्रिया सुळेंच्या नेतृत्वाखाली खासदार घेणार पंतप्रधान मोदींची भेट

मुंबई : महाराष्ट्रातील दुष्काळसदृश परिस्थिती आणि शेतकऱ्यांच्या विविध प्रश्नांकडे केंद्र सरकारचे लक्ष वेधण्यासाठी राष्ट्रवादी काँग्रेस शरदचंद्र पवार पक्षाच्या सर्व खासदारांनी थेट पंतप्रधान नरेंद्र मोदी यांची भेट घेण्याचा निर्णय घेतला आहे. खासदार सुप्रिया सुळे यांच्या नेतृत्वाखाली सोमवारी ही भेट होणार असून, संसदेत सकाळी अकरा वाजता चर्चा होण्याची शक्यता आहे. राज्यातील पाणीटंचाई, पिकांचे नुकसान, शेतकऱ्यांची आर्थिक कोंडी आणि केंद्राकडून अपेक्षित मदत या विषयांवर या वेळी सविस्तर चर्चा होण्याची शक्यता आहे.

महाराष्ट्रातील काही भागांत पावसाची ओढ, पाण्याची कमतरता आणि शेतीपुढील वाढत्या अडचणींमुळे ग्रामीण भागातील परिस्थिती चिंताजनक बनली आहे. अनेक ठिकाणी पिण्याच्या पाण्याचा प्रश्न गंभीर होत असून, शेतीच्या नुकसानीबरोबरच जनावरांसाठी चारा आणि पाण्याची उपलब्धता हा प्रश्नही निर्माण झाला आहे. या पार्श्वभूमीवर राज्यातील दुष्काळग्रस्त भागांना केंद्र सरकारकडून तातडीने मदत मिळावी, यासाठी पवार पक्षाच्या खासदारांकडून पंतप्रधानांसमोर परिस्थिती मांडली जाणार आहे. शेतकऱ्यांना दिलासा देण्यासाठी केंद्राने ठोस निर्णय घ्यावा, अशी मागणी या भेटीत केली जाण्याची शक्यता आहे. दुष्काळग्रस्त आणि नुकसानग्रस्त भागांसाठी केंद्राकडून विशेष आर्थिक मदत उपलब्ध करून द्यावी, अशी मागणी खासदारांकडून केली जाऊ शकते. पिकांचे नुकसान झालेल्या शेतकऱ्यांना तातडीने आर्थिक मदत मिळावी, तसेच ही मदत थेट त्यांच्या बँक खात्यांत जमा करण्याची व्यवस्था करावी, यावरही पक्षाचा भर राहण्याची शक्यता आहे. ग्रामीण भागातील पाणीटंचाई दूर करण्यासाठी टँकरद्वारे पाणीपुरवठा वाढवणे, जनावरांसाठी छावण्या उभारणे आणि चारा उपलब्ध करून देण्यासाठी केंद्राकडून विशेष साहाय्य मिळावे, अशी मागणीही केली जाऊ शकते. याशिवाय पीकविम्याची प्रलंबित रक्कम शेतकऱ्यांना लवकर मिळावी, यासाठी संबंधित विमा कंपन्यांना आवश्यक निर्देश देण्याची मागणी केंद्राकडे केली जाण्याची शक्यता आहे. संसदेचे पावसाळी अधिवेशन सुरू असताना पवार पक्षाच्या सर्व खासदारांनी एकत्रितपणे पंतप्रधानांची भेट घेण्याचा निर्णय घेतल्याने या भेटीकडे राजकीयदृष्ट्याही महत्त्वाने पाहिले जात आहे. सुप्रिया सुळे यांच्या नेतृत्वाखाली होणाऱ्या या भेटीत महाराष्ट्रातील जनतेचे प्रश्न थेट पंतप्रधानांसमोर मांडण्याचा प्रयत्न केला जाणार आहे. राज्यात सत्ताधारी महायुती आणि विरोधकांमध्ये विविध प्रश्नांवरून राजकीय संघर्ष सुरू असतानाच ही भेट होत असल्याने तिच्या राजकीय परिणामांबाबतही चर्चा सुरू झाली आहे.