भारतीय वस्त्रोद्योग निर्यातीला उभारी; 2.1 टक्के वाढ

नवी दिल्ली : भारताच्या वस्त्रोद्योग क्षेत्राने आर्थिक वर्ष 2025-26 मध्ये जागतिक बाजारपेठेत स्थैर्य टिकवून ठेवत वाढीची नोंद केली आहे. हस्तकला वस्तूंसह एकूण वस्त्रोद्योग निर्यातीत 2.1 टक्क्यांची वाढ होऊन ती 3 लाख 16 हजार 334.9 कोटी रुपयांपर्यंत पोहोचली आहे. मागील आर्थिक वर्षात हीच निर्यात 3 लाख 9 हजार 859.3 कोटी रुपये होती. या वाढीमुळे जागतिक पातळीवर भारतीय वस्त्रउद्योगावरील विश्‍वास आणि सातत्यपूर्ण मागणी अधोरेखित झाली आहे.
वस्त्रोद्योगातील विविध घटकांपैकी तयार वस्त्र प्रावरण क्षेत्राने सर्वाधिक वाटा उचलला आहे. या विभागातील निर्यातीत 2.9 टक्के वाढ होऊन ती 1 लाख 39 हजार 349.6 कोटी रुपयांवर पोहोचली आहे. यापूर्वी हा आकडा 1 लाख 35 हजार 427.6 कोटी रुपये इतका होता. यामुळे तयार वस्त्र उद्योगाची जागतिक स्पर्धात्मकता अधिक मजबूत झाल्याचे स्पष्ट होते. सूत, कापड, तयार वस्तू आणि हातमाग उत्पादनांच्या निर्यातीमध्येही स्थिर वाढ दिसून आली आहे. या विभागातील निर्यात 1 लाख 2 हजार 399.7 कोटी रुपयांपर्यंत पोहोचली असून मागील वर्षाच्या तुलनेत 0.4 टक्क्यांची वाढ नोंदवली गेली आहे. दुसरीकडे, मानवनिर्मित सूत व कापड क्षेत्राने अधिक चांगली कामगिरी करत 3.6 टक्क्यांची वाढ साध्य केली आहे. या विभागातील निर्यात 41 हजार 196 कोटी रुपयांवरून 42 हजार 687.8 कोटी रुपयांपर्यंत वाढली आहे. एप्रिल 2025 ते फेब्रुवारी 2026 या कालावधीत भारताने 120 हून अधिक देशांमध्ये निर्यात वाढवली आहे. यामुळे भारतीय वस्त्रोद्योगाचा जागतिक विस्तार अधिक व्यापक झाल्याचे दिसून येते. संयुक्त अरब अमिरात, युनायटेड किंगडम, जर्मनी, स्पेन, जपान तसेच आफ्रिका खंडातील इजिप्त, नायजेरिया, सेनेगल आणि सुदान या बाजारपेठांमध्ये लक्षणीय वाढ नोंदवली गेली आहे. एकूणच, जागतिक स्पर्धेच्या पार्श्‍वभूमीवर भारतीय वस्त्रोद्योगाने सातत्यपूर्ण वाढ राखत निर्यातीत आपली भक्कम उपस्थिती कायम ठेवली असल्याचे या आकडेवारीतून स्पष्ट होते.