श्रीगोंद्यात अखंड हरिनाम सप्ताहाचे आयोजन

श्रीगोंदा : तालुक्यात अखंड हरिनाम सप्ताहाचे आयोजन करण्यात आले असून भाविकांसाठी आठवडाभर विविध धार्मिक व सांस्कृतिक कार्यक्रमांची मेजवानी उपलब्ध होणार आहे. दि. 19 एप्रिल  ते 26 एप्रिल 2026 या कालावधीत हा सप्ताह उत्साहात साजरा होणार आहे.
या सप्ताहाचे आयोजन श्रीगोंदा तालुका उत्सव समितीच्या वतीने करण्यात आले आहे. श्री संत शिरोमणी सावता महाराज यांच्या जयंतीनिमित्त हा सोहळा आयोजित करण्यात आला असून संत परंपरेच्या विचारांचा जागर करण्यावर भर देण्यात येणार आहे.
सप्ताहादरम्यान दररोज सकाळ-सायंकाळ हरिनाम, भजन, कीर्तन तसेच प्रवचनांचे आयोजन करण्यात आले आहे. दररोज सायंकाळी 6.30 ते 8.30 या वेळेत नामांकित कीर्तनकारांची कीर्तनसेवा होणार आहे. राज्यातील विविध भागांतून येणारे कीर्तनकार आपल्या प्रवचनातून अध्यात्म, समाजप्रबोधन आणि संत विचार मांडणार आहेत. तसेच सप्ताहात काकडा आरती, पालखी सोहळा, हरिपाठ, महाप्रसाद अशा विविध धार्मिक कार्यक्रमांचे आयोजन करण्यात आले आहे. सप्ताहाच्या शेवटच्या दिवशी विशेष कार्यक्रम व महाप्रसादाचे आयोजन करण्यात येणार आहे. या धार्मिक सोहळ्यासाठी श्रीगोंदा व परिसरातील भाविकांनी मोठ्या संख्येने उपस्थित राहून लाभ घ्यावा, असे आवाहन आयोजकांनी केले आहे.