अमरनाथ यात्रेसाठी प्रशासन सज्ज सुरक्षा, आरोग्य व स्वच्छतेला प्राधान्य

श्रीनगर : आगामी श्री अमरनाथ यात्रा ३ जुलैपासून सुरू होत असून प्रशासनाने तयारीला वेग दिला आहे. यात्रा मार्गावरील बर्फ हटवणे, रस्त्यांची दुरुस्ती आणि विविध सोयीसुविधांची उभारणी युद्धपातळीवर सुरू आहे. यात्रेकरूंची सुरक्षितता, आरोग्य सुविधा आणि स्वच्छतेवर यंदा विशेष भर देण्यात येत आहे.

गांदरबल जिल्ह्याचे उपायुक्त जतीन किशोर यांनी बालटाल मार्गावरील तयारीचा आढावा घेत संबंधित विभागांच्या अधिकाऱ्यांसोबत बैठक घेतली. या बैठकीत पोलीस विभागासोबत सुरक्षा व्यवस्थेची सविस्तर चर्चा करण्यात आली. तपासणी नाके, झडती केंद्रे आणि सुरक्षा तैनातीची ठिकाणे निश्चित करण्याच्या सूचना देण्यात आल्या. तसेच यात्रेच्या मुख्य प्रवेशद्वारांवर अत्याधुनिक तपासणी यंत्रणा बसवण्याचे आदेश देण्यात आले.

सीमा रस्ते संघटनेच्या अधिकाऱ्यांनी सांगितले की, बर्फ हटवण्याचे काम वेगाने सुरू असून नियोजित वेळेत मार्ग वाहतुकीसाठी खुला केला जाईल. पायाभूत सुविधांशी संबंधित अनेक कामांना सुरुवात झाली असून आवश्यक निविदा प्रक्रियाही पूर्ण करण्यात येत आहे. कामगार विभागाने पोनी आणि पिठू चालकांच्या नोंदणी प्रक्रियेला सुरुवात झाल्याची माहिती दिली. यात्रेकरूंची गैरसोय टाळण्यासाठी ओळख पडताळणी आणि नोंदणी केंद्रांची संख्या वाढवण्यात येणार आहे. तत्काळ नोंदणी केंद्रांवर अतिरिक्त सुविधा उपलब्ध करून देण्याचाही निर्णय घेण्यात आला आहे.

यात्रा मार्गावर स्वच्छतेची विशेष काळजी घेण्याच्या सूचना प्रशासनाने दिल्या आहेत. पुरेशा शौचालयांची व्यवस्था, कचरा व्यवस्थापन आणि परिसर स्वच्छ ठेवण्यावर भर दिला जात आहे. आरोग्य विभागाकडून बालटालसह विविध ठिकाणी वैद्यकीय पथके, आवश्यक उपकरणे आणि प्रशिक्षित कर्मचारी तैनात करण्याची तयारी सुरू आहे. १३ ते ७० वर्षे वयोगटातील भाविकांना अमरनाथ यात्रेत सहभागी होता येणार आहे. मात्र सहा आठवड्यांपेक्षा अधिक गर्भावस्था असलेल्या महिलांना यात्रेस परवानगी दिली जाणार नाही. धार्मिक श्रद्धेसोबतच साहसी अनुभव देणारी ही यात्रा देशभरातील भाविकांसाठी आकर्षणाचे केंद्र मानली जाते.