परळी येथे पैशांच्या वादातून मित्राकडूनच तरुणाची हत्या; रेल्वे रुळावर मृतदेह टाकून अपघाताचा बनाव

बीड : बीड जिल्ह्यातील परळी येथे पैशांच्या व्यवहारातून उद्भवलेल्या वादाचे पर्यवसान एका तरुणाच्या निर्घृण हत्येत झाल्याची धक्कादायक घटना उघडकीस आली आहे. सुरुवातीला रेल्वे अपघात अथवा आत्महत्येचा प्रकार वाटणाऱ्या या प्रकरणाचा पोलिसांनी अवघ्या ४८ तासांत छडा लावत दोन संशयितांना अटक केली आहे.

परळीतील सरदारनगर परिसरात राहणारे अफझलखान ऊर्फ तोहीद पठाण (वय ३६) हे काही दिवसांपूर्वी मित्रांसोबत बाहेर जात असल्याचे सांगून घरातून निघाले होते. त्यानंतर सलग दोन दिवस त्यांचा कुटुंबीयांशी कोणताही संपर्क झाला नाही. त्यामुळे कुटुंबीय चिंतेत असतानाच लेंडेवाडी शिवाराजवळील रेल्वे मार्गावर त्यांचा मृतदेह आढळून आला. या घटनेमुळे परिसरात खळबळ उडाली होती.

घटनस्थळावरील परिस्थिती पाहता सुरुवातीला हा रेल्वे अपघात किंवा आत्महत्येचा प्रकार असावा, असा अंदाज व्यक्त करण्यात आला होता. मात्र, तपासादरम्यान पोलिसांना काही बाबी संशयास्पद वाटल्याने त्यांनी सर्व बाजूंनी चौकशी सुरू केली. तपासाच्या धागेदोऱ्यांवरून पोलिसांनी अफझलखान यांचे निकटवर्तीय मित्र ऋषिकेश फड आणि गौरव व्यास यांना चौकशीसाठी ताब्यात घेतले.

सुरुवातीला दोघांनीही पोलिसांची दिशाभूल करण्याचा प्रयत्न करत विसंगत माहिती दिली. त्यामुळे त्यांच्यावरील संशय अधिक गडद झाला. यानंतर परिसरातील चित्रण यंत्रणांमधील (CCTV) दृश्यफिती तसेच भ्रमणध्वनीच्या (Mobile) तांत्रिक तपासातून महत्त्वाचे पुरावे समोर आले. या पुराव्यांच्या आधारे पोलिसांनी दोघांची कसून चौकशी केली असता, पैशांच्या देवाणघेवाणीतून निर्माण झालेल्या वादातून अफझलखान यांची हत्या केल्याची बाब उघड झाली.