तृणमूल काँगे्रसच्या दोन खासदारांचे राजीनामे

नवी दिल्ली : पश्‍चिम बंगालमधील राजकीय घडामोडींच्या पार्श्‍वभूमीवर तृणमूल काँग्रेसला राजधानी दिल्लीतही मोठा धक्का बसला आहे. पक्षाचे दोन राज्यसभा सदस्य सुखेंदू शेखर रॉय आणि कोएल मलिक यांनी आपल्या सदस्यत्वाचा राजीनामा दिल्याची माहिती समोर आली आहे. यापैकी सुखेंदू शेखर रॉय यांनी केवळ राज्यसभा सदस्यत्वच नव्हे, तर पक्षाचाही राजीनामा दिल्याचे सांगितले आहे.
राजीनाम्यानंतर रॉय यांनी पक्षातील कार्यपद्धतीवर गंभीर प्रश्‍न उपस्थित केले. भ्रष्टाचाराच्या मुद्द्यांवर उघडपणे भूमिका घेतल्यामुळे आपल्याला पक्षात एकाकी करण्यात आल्याचा आरोप त्यांनी केला. त्यांनी आपला राजीनामा राज्यसभेच्या सभापतींकडे सादर केला असून, पक्षातील वाढत्या गैरव्यवहारांमुळे हा निर्णय घ्यावा लागल्याचे स्पष्ट केले. रॉय यांनी पश्‍चिम बंगालमधील विविध शहरांतील आर्थिक आणि प्रशासकीय व्यवहारांची सखोल चौकशी करण्याची मागणी केली. गेल्या काही वर्षांत घडलेल्या कथित गैरप्रकारांचा तपास झाल्यास अनेक बाबी समोर येतील, असे ते म्हणाले. राज्यातील जनतेत विविध प्रश्‍नांवर नाराजी निर्माण झाली असून, त्याचा परिणाम राजकीय घडामोडींवर झाल्याचेही त्यांनी नमूद केले. यावर्षी राज्यसभेवर निवडून गेलेल्या कोएल मलिक यांनीही सदस्यत्वाचा राजीनामा दिल्याची माहिती समोर आली आहे. त्यामुळे तृणमूल काँग्रेसच्या संसदीय गटात अस्वस्थता वाढल्याची चर्चा सुरू झाली आहे. सुखेंदू शेखर रॉय हे 2011 मध्ये तृणमूल काँग्रेसमध्ये दाखल झाले होते. पक्षाच्या अनेक महत्त्वाच्या टप्प्यांवर त्यांनी नेतृत्वाला साथ दिली होती. मात्र अलीकडील काळात त्यांनी पक्षाच्या भूमिकांबाबत उघडपणे नाराजी व्यक्त करण्यास सुरुवात केली होती. त्यांच्या काही विधानांमुळे ते भविष्यात वेगळा राजकीय मार्ग स्वीकारू शकतात, अशीही चर्चा राजकीय वर्तुळात रंगली आहे. या राजीनाम्यांनंतर तृणमूल काँग्रेसमध्ये अंतर्गत मतभेद वाढत असल्याच्या चर्चांना अधिक बळ मिळाले आहे. पक्षातील काही लोकप्रतिनिधी नेतृत्वाच्या निर्णयांबाबत नाराज असल्याचे बोलले जात असून, भविष्यात आणखी काही राजकीय घडामोडी घडण्याची शक्यता वर्तवली जात आहे.