अध्यात्म, तर्कशक्ती आणि समाजप्रबोधनातील कार्याची राज्यस्तरावर दखल; ह.भ.प. राजू महाराज लोखंडे यांचा ‘जिजाऊ माँसाहेब आदर्श पुरस्कार-2026’ ने गौरव

आष्टी : अध्यात्माच्या माध्यमातून समाजप्रबोधन करताना तर्कशक्तीचा पुरस्कार, पर्यावरण संवर्धनाची जनजागृती आणि नैराश्यग्रस्तांना सकारात्मक जीवनदृष्टी देण्यासाठी सातत्याने कार्य करणारे ह.भ.प. राजू महाराज लोखंडे यांचा ‘जिजाऊ माँसाहेब आदर्श पुरस्कार-2026’ देऊन गौरव करण्यात आला. त्यांच्या विविध सामाजिक, आध्यात्मिक व प्रबोधनात्मक कार्याची राज्यस्तरावर दखल घेत हा प्रतिष्ठेचा पुरस्कार प्रदान करण्यात आला.

मराठा सेवा संघ प्रणित तानुबाई बिरजे पत्रकार परिषद, आष्टी यांच्या वतीने राजमाता जिजाऊ विद्यार्थी वसतिगृह, आष्टी येथे भव्य पुरस्कार वितरण सोहळ्याचे आयोजन करण्यात आले होते. या कार्यक्रमात माजी कुलगुरू सर्जेराव निमसे, उद्योजक व वक्ते एन. बी. धुमाळ, जे. आर. पवार यांच्यासह विविध क्षेत्रातील मान्यवरांची प्रमुख उपस्थिती होती. मान्यवरांच्या हस्ते ह.भ.प. राजू महाराज लोखंडे यांना शाल, सन्मानचिन्ह व पुष्पगुच्छ देऊन ‘जिजाऊ माँसाहेब आदर्श पुरस्कार-2026’ प्रदान करण्यात आला.

राजू महाराज लोखंडे हे अध्यात्म आणि तर्कशक्ती यांचा समतोल साधत समाजातील विविध प्रश्नांवर प्रबोधनाचे कार्य करीत आहेत. अंधश्रद्धा, नैराश्य, सामाजिक गैरसमज तसेच पर्यावरणाबाबत जनजागृती करण्यासाठी ते विविध माध्यमांतून समाजाशी संवाद साधत आहेत. विशेषतः नैराश्यग्रस्त व्यक्तींमध्ये सकारात्मक विचार निर्माण करून त्यांना जीवनाकडे नव्या दृष्टीने पाहण्याची प्रेरणा देण्याचे त्यांचे कार्य उल्लेखनीय मानले जाते.

अध्यात्म केवळ धार्मिकतेपुरते मर्यादित न ठेवता त्याला सामाजिक बांधिलकीची जोड देण्याचा प्रयत्न त्यांच्या कार्यातून दिसून येतो. पर्यावरण संवर्धन, वृक्षारोपण आणि निसर्गाबाबत नागरिकांमध्ये जागरूकता निर्माण करण्यासाठीही त्यांनी सातत्याने पुढाकार घेतला आहे. त्यामुळे त्यांच्या कार्याची आष्टीसह राज्यातील विविध भागांत दखल घेतली जात आहे.

यापूर्वीही ह.भ.प. राजू महाराज लोखंडे यांना ‘समाजरत्न’, ‘समाजभूषण’, ‘लोकरत्न’ आणि ‘महाराष्ट्र भूषण’ यांसारख्या विविध पुरस्कारांनी सन्मानित करण्यात आले आहे. ‘जिजाऊ माँसाहेब आदर्श पुरस्कार-2026’ हा त्यांच्या सामाजिक व प्रबोधनात्मक कार्याचा आणखी एक महत्त्वपूर्ण सन्मान ठरला आहे. पुरस्कार स्वीकारल्यानंतर उपस्थित मान्यवरांनी राजू महाराज लोखंडे यांच्या कार्याचे कौतुक करत समाजप्रबोधनाची ही चळवळ अधिक व्यापक करण्यासाठी शुभेच्छा दिल्या. पुरस्कारामुळे त्यांच्या कार्याला नवी ऊर्जा मिळाली असून, समाजहिताचे विविध उपक्रम अधिक प्रभावीपणे राबविण्याचा संकल्प त्यांनी व्यक्त केला.