युरोपमध्ये विक्रमी उष्णतेचा कहर; तेराशेहून अधिक मृत्यू

लंडन : युरोप खंड सध्या अभूतपूर्व उष्णतेच्या लाटेचा सामना करत असून, त्याचे गंभीर परिणाम नागरिकांच्या आरोग्यावर होत आहेत. जागतिक आरोग्य संघटनेने दिलेल्या माहितीनुसार, 21 जूनपासून आतापर्यंत उष्णतेशी संबंधित तेराशेहून अधिक अतिरिक्त मृत्यूंची नोंद झाली आहे. वाढत्या तापमानामुळे आरोग्य सेवा यंत्रणांवर मोठा ताण निर्माण झाला असून अनेक देशांमध्ये सतर्कतेचा इशारा देण्यात आला आहे.
ही उष्णतेची लाट आता पश्‍चिमेकडून पूर्व युरोपकडे सरकत असून, जर्मनी, झेक प्रजासत्ताक, हंगेरी आणि पोलंड या देशांमध्ये तिचा तीव्र परिणाम जाणवत आहे. अनेक भागांमध्ये तापमानाने विक्रमी पातळी गाठली असून नागरिकांना घराबाहेर पडताना विशेष काळजी घेण्याचे आवाहन करण्यात आले आहे.
फ्रान्सच्या आरोग्य विभागाने दिलेल्या माहितीनुसार, मागील काही दिवसांत अपेक्षेपेक्षा सुमारे एक हजार अधिक मृत्यूंची नोंद झाली आहे. रुग्णालयांमध्ये उष्णतेशी संबंधित आजारांच्या रुग्णांची संख्या वाढल्याने वैद्यकीय व्यवस्थेवर अतिरिक्त भार पडत आहे. जागतिक आरोग्य संघटनेचे महासंचालक टेड्रोस अधानोम घेब्रेयेसस यांनी उष्णतेला मूक घातक असे संबोधत ती मानवी आरोग्यासाठी गंभीर धोका असल्याचे सांगितले. त्यांच्या मते, युरोपमधील अनेक घरे, शैक्षणिक संस्था आणि कार्यस्थळे इतक्या तीव्र तापमानाचा सामना करण्यासाठी तयार करण्यात आलेली नाहीत, त्यामुळे नागरिकांच्या सुरक्षिततेचा प्रश्‍न अधिक गंभीर बनला आहे. अहवालानुसार, युरोपमधील कोट्यवधी नागरिकांनी 35 अंश सेल्सियस किंवा त्याहून अधिक तापमानाचा अनुभव घेतला आहे.