सागवान तस्करीचे मोठे रॅकेट सक्रिय? लोहा-चेनापूर वनक्षेत्रातील कथित वृक्षतोडीने खळबळ

नांदेड: हदगाव तालुक्यातील लोहा आणि चेनापूर वनपरिक्षेत्रात मोठ्या प्रमाणावर सागवान वृक्षांची अवैध तोड झाल्याच्या चर्चेमुळे परिसरात खळबळ उडाली आहे. मौल्यवान वनसंपत्तीची मोठ्या प्रमाणात हानी झाल्याचे बोलले जात असताना, या प्रकरणाबाबत वन विभागाकडून अद्याप अधिकृत माहिती समोर न आल्याने संशयाचे वातावरण निर्माण झाले आहे.

स्थानिक सूत्रांकडून मिळालेल्या माहितीनुसार, जंगलातून तोडलेले सागवान लाकूड बाहेर नेले जात असताना काही संशयितांना वन विभागाने पकडल्याची चर्चा आहे. मात्र, या कारवाईचा तपशील अद्याप गुप्त ठेवण्यात आल्याचे दिसून येत आहे. त्यामुळे जप्त मालाचे प्रमाण, संबंधित आरोपींची ओळख आणि त्यांच्यावर करण्यात आलेली कारवाई याबाबत प्रश्नचिन्ह निर्माण झाले आहे. वनक्षेत्रातील वृक्षतोडीचा नेमका आकडा काय आहे, किती झाडे तोडण्यात आली, त्याची अधिकृत नोंद झाली का, तसेच जप्त लाकडाचे मूल्य किती आहे याबाबत कोणतीही माहिती उपलब्ध नसल्याने नागरिकांमध्ये नाराजी व्यक्त होत आहे.

पर्यावरणप्रेमी आणि स्थानिक नागरिकांच्या मते, जर मोठ्या प्रमाणात वृक्षतोड झाली असेल तर त्यामागील संपूर्ण साखळीचा शोध घेणे आवश्यक आहे. केवळ प्रत्यक्ष वाहतूक करणाऱ्यांवर कारवाई करून थांबणे पुरेसे नसून या प्रकरणातील मुख्य सूत्रधारांपर्यंत पोहोचणे गरजेचे आहे. दरम्यान, वन विभागाने संपूर्ण प्रकरणाची वस्तुस्थिती जनतेसमोर मांडावी, जप्ती आणि गुन्हा नोंदविण्याची माहिती जाहीर करावी तसेच दोषींवर कठोर कारवाई करावी, अशी मागणी जोर धरत आहे. वनसंपत्तीच्या संरक्षणाशी संबंधित हा गंभीर विषय असल्याने याबाबत पारदर्शकता राखणे आवश्यक असल्याचे मतही व्यक्त होत आहे.