लोकराज्यमध्ये डॉ. आंबेडकरांचाफोटो छापला चुकीच्या पद्धतीनेविधानसभेत गदारोळ ; कारवाईचे मुख्यमंत्री फडणवीसांचे आश्‍वासन

मुंबई : महाराष्ट्र शासनाच्या माहिती व जनसंपर्क महासंचालनालयाकडून प्रकाशित होणार्‍या ’लोकराज्य’ या अधिकृत मासिकाच्या ताज्या अंकात भारतरत्न डॉ. बाबासाहेब आंबेडकर यांच्या छायाचित्राबाबत झालेल्या गंभीर चुकीमुळे राज्याच्या राजकीय वर्तुळात मोठी खळबळ उडाली आहे. मासिकात डॉ. बाबासाहेब आंबेडकर यांचे छायाचित्र तसेच त्यांना प्रदान करण्यात आलेल्या भारतरत्न सन्मानाचे चिन्ह उलटे प्रसिद्ध झाल्याचे निदर्शनास आल्यानंतर गुरुवारी विधानसभेत या मुद्द्यावरून विरोधकांनी सरकारला धारेवर धरले.
या घटनेचे तीव्र पडसाद पावसाळी अधिवेशनात उमटले. विरोधी पक्षातील सदस्यांनी ही चूक अत्यंत गंभीर असल्याचे सांगत संबंधित अधिकार्‍यांवर तातडीने कठोर कारवाई करण्याची मागणी केली. काही काळ सभागृहात घोषणाबाजी झाल्याने कामकाजातही व्यत्यय आला. ’लोकराज्य’ हे राज्य शासनाचे अधिकृत मासिक असल्याने त्यामधील माहिती, छायाचित्रे आणि मांडणी यामध्ये अत्यंत अचूकता अपेक्षित असते. मात्र, ताज्या अंकात महामानव डॉ. बाबासाहेब आंबेडकर यांचे छायाचित्र आणि भारतरत्न सन्मानाचे चिन्ह उलट्या स्वरूपात प्रसिद्ध झाल्याने संपादकीय प्रक्रियेतील निष्काळजीपणावर प्रश्‍नचिन्ह उपस्थित झाले आहे. ही बाब समोर आल्यानंतर सामाजिक आणि राजकीय स्तरावरही तीव्र प्रतिक्रिया उमटल्या. अशा प्रकारची चूक शासकीय प्रकाशनात होणे अत्यंत दुर्दैवी असल्याचे मत विविध स्तरांतून व्यक्त करण्यात आले. विधानसभेचे कामकाज सुरू होताच विरोधी पक्षाच्या सदस्यांनी हा विषय उपस्थित केला. डॉ. बाबासाहेब आंबेडकर यांच्याविषयी संपूर्ण देशात आदराची भावना असून त्यांच्या छायाचित्राबाबत झालेली ही चूक केवळ तांत्रिक त्रुटी म्हणून दुर्लक्षित करता येणार नाही, असे मत विरोधकांनी मांडले. संबंधित अधिकारी व कर्मचार्‍यांची जबाबदारी निश्‍चित करून त्यांच्यावर तातडीने कारवाई करावी, तसेच शासनाने या घटनेबाबत सभागृहात स्पष्ट भूमिका मांडावी, अशी मागणी करण्यात आली. या मुद्द्यावरून काही काळ सभागृहात गदारोळ निर्माण झाला. विरोधकांनी उपस्थित केलेल्या आक्षेपांची दखल घेत मुख्यमंत्री देवेंद्र फडणवीस यांनी सभागृहात याबाबत निवेदन केले. त्यांनी या प्रकाराबद्दल खेद व्यक्त करत ही चूक अत्यंत गंभीर असल्याचे नमूद केले. डॉ. बाबासाहेब आंबेडकर हे देशाच्या संविधानाचे शिल्पकार असून संपूर्ण देशासाठी प्रेरणास्थान आहेत. त्यांच्या प्रतिमेबाबत झालेला कोणताही निष्काळजीपणा स्वीकारला जाणार नाही, असे त्यांनी स्पष्ट केले.
या प्रकरणाची तातडीने चौकशी करून जे अधिकारी किंवा कर्मचारी जबाबदार आढळतील, त्यांच्यावर पुढील 24 तासांच्या आत प्रशासकीय आणि कायदेशीर पातळीवर कठोर कारवाई करण्यात येईल, असे आश्‍वासन मुख्यमंत्र्यांनी सभागृहात दिले. मुख्यमंत्र्यांच्या आश्‍वासनानंतर सभागृहातील वातावरण काहीसे निवळले. मात्र, ही चूक नेमकी कोणत्या टप्प्यावर झाली, संपादन, मांडणी की छपाई प्रक्रियेत दुर्लक्ष झाले, याची सखोल चौकशी करून जबाबदारी निश्‍चित करण्याची मागणी कायम आहे. शासकीय प्रकाशनांमध्ये अशा प्रकारच्या त्रुटी टाळण्यासाठी संपादकीय आणि छपाई प्रक्रियेत अधिक दक्षता घेण्याची गरज असल्याची चर्चा यानिमित्ताने पुन्हा एकदा पुढे आली आहे.