भररस्त्यात महिलेच्या प्रसूतीचा थरार; डॉक्टर महिलेने वाचवले मायलेकीची प्राण

पुणे : जिल्ह्यातील शिरूर शहरात घडलेली एक घटना सध्या सर्वत्र चर्चेचा विषय ठरत आहे. वैद्यकीय सेवा ही केवळ व्यवसाय नसून ती माणुसकीची आणि कर्तव्याची जोड असलेली सेवा आहे, याचा प्रत्यय या प्रसंगातून पुन्हा एकदा आला. प्रसूतीच्या तीव्र वेदनांनी विव्हळलेल्या एका गर्भवती महिलेची भररस्त्यातच सुरक्षित प्रसूती करून एका महिला डॉक्टरांनी आई आणि बाळ दोघांचेही प्राण वाचवले.
शिरूरमधील जोशीवाडी परिसरात राहणारी एक गर्भवती महिला सकाळी प्रसूतीच्या कळा सुरू झाल्याने शिरूर ग्रामीण रुग्णालयाकडे रवाना झाली होती. कुटुंबीयांसोबत ती रुग्णालयाच्या दिशेने निघाली असली, तरी रुग्णालय अगदी काही अंतरावर असतानाच तिच्या वेदना असह्य झाल्या. चालणे तर दूरच, तिला उभे राहणेही कठीण झाले आणि ती भररस्त्यातच बसून राहिली. रस्त्यावरून ये-जा करणार्‍या नागरिकांचे लक्ष तिच्याकडे गेले. तिची अवस्था पाहून काहीजण घाबरले, तर काहींनी तत्काळ मदतीसाठी पुढाकार घेतला. परिस्थिती हाताबाहेर जाऊ शकते, हे लक्षात येताच नागरिकांनी जवळच असलेल्या महिला डॉक्टरांना संपर्क साधला. घटनेची माहिती मिळताच संबंधित महिला डॉक्टरांनी क्षणाचाही विलंब न करता घटनास्थळी धाव घेतली. त्यांनी महिलेची तपासणी केली असता प्रसूती अत्यंत निकडीच्या टप्प्यावर आल्याचे लक्षात आले. अशा अवस्थेत तिला रुग्णालयात नेणे धोकादायक ठरू शकते, हे त्यांनी तात्काळ ओळखले. वेळ न दवडता त्यांनी जागेवरच प्रसूती करण्याचा धाडसी निर्णय घेतला. रस्त्यावर उपलब्ध असलेल्या अत्यल्प साधनसामग्रीत आणि लोकांच्या मदतीने त्यांनी परिस्थिती नियंत्रणात आणली. काही महिलांनी मदतीसाठी पुढे येत आवश्यक गोपनीयता राखण्याचाही प्रयत्न केला. घटनेच्या ठिकाणी काही काळ अत्यंत तणावपूर्ण वातावरण निर्माण झाले होते. उपस्थित प्रत्येक जण त्या आई आणि बाळाच्या सुरक्षिततेसाठी चिंतित होता. डॉक्टरांनी अत्यंत कौशल्याने आणि शांतपणे संपूर्ण प्रक्रिया पार पाडली. काही मिनिटांच्या संघर्षानंतर अखेर नवजात बाळाच्या रडण्याचा आवाज परिसरात घुमला आणि सगळ्यांनी सुटकेचा नि:श्‍वास सोडला. आई आणि बाळ दोघेही सुरक्षित असल्याचे स्पष्ट होताच उपस्थित नागरिकांमध्ये आनंदाची लहर पसरली. काहींनी तर त्या क्षणाला देवदूतासारखी मदत असेही वर्णन केले.

माणुसकीचे जिवंत उदाहरण
या संपूर्ण घटनेत डॉक्टरांनी दाखवलेले प्रसंगावधान, धैर्य आणि कर्तव्यनिष्ठा हे खरोखरच प्रेरणादायी आहे. वैद्यकीय क्षेत्रातील जबाबदारी किती मोठी असते, याची जाणीव या प्रसंगातून होते. वेळेवर घेतलेल्या योग्य निर्णयामुळे एक मोठा अनर्थ टळला. घटनेनंतर स्थानिक नागरिक, रुग्णालय कर्मचारी आणि सामाजिक माध्यमांवरूनही या डॉक्टरांचे मोठ्या प्रमाणावर कौतुक केले जात आहे. अशा डॉक्टरांमुळेच समाजात अजूनही माणुसकी जिवंत आहे, अशा प्रतिक्रिया व्यक्त होत आहेत.