पंकजाताई मुंडे यांच्या वाढदिवसानिमित्त बालाघाटमध्ये गरजू महिलांना साड्यांचे वाटप आणि वृक्षारोपण

बीड: महाराष्ट्राच्या धडाडीच्या लोकनेत्या आणि माजी मंत्री ना. पंकजाताई मुंडे यांच्या वाढदिवसाचे औचित्य साधून राज्यभरात विविध सामाजिक उपक्रम उत्साहात राबवले जात आहेत. याच सामाजिक बांधिलकीचे भान जपत भारतीय जनता पार्टीचे युवा नेते व बालाघाट मंडळाचे अध्यक्ष अशोक रसाळ यांच्या पुढाकारातून बालाघाट परिसरात गरजू महिलांना साड्यांचे वाटप आणि भव्य वृक्षारोपण कार्यक्रमाचे आयोजन करण्यात आले होते.

समाजातील शेवटच्या घटकापर्यंत मदत पोहोचवणे आणि पर्यावरण संवर्धनाचा संदेश देणे हा या उपक्रमाचा मुख्य उद्देश होता. आयोजित कार्यक्रमात परिसरातील गरजू व गरीब महिलांना साड्यांचे मोफत वाटप करण्यात आले. साडी भेट मिळाल्यानंतर लाभार्थी महिलांच्या चेहऱ्यावर आनंद पाहायला मिळाला. साडी वाटपानंतर उपस्थित महिलांच्या हस्ते परिसरात विविध प्रकारच्या रोपांची लागवड (वृक्षारोपण) करण्यात आली.

यावेळी उपस्थित महिलांशी संवाद साधताना भाजप बालाघाट मंडळ अध्यक्ष अशोक रसाळ म्हणाले की, आज आपण जी रोपे लावत आहोत, ती फक्त झाडे नसून आपल्या भविष्याची सावली आहे. या रोपांचे योग्य संगोपन करून त्यांचे भविष्यात वटवृक्षात रूपांतर करा. झाडे जगवणे हाच आपल्या प्रिय लोकनेत्या पंकजाताई मुंडे यांना दिलेल्या वाढदिवसाचा खरा आणि मोठा आशीर्वाद ठरेल.

आपली भावना व्यक्त करताना अशोक रसाळ पुढे म्हणाले की, पंकजाताई मुंडे यांच्या प्रेरणेतून आणि नेतृत्वाखाली समाजातील गरजू, वंचित व सर्वसामान्य घटकांसाठी सातत्याने कार्य करण्याची ऊर्जा आम्हा सर्व कार्यकर्त्यांना मिळते. आमच्यासारख्या सामान्य कार्यकर्त्यांना समाजात ओळख आणि प्रतिष्ठा मिळवून देणाऱ्या या लोकनेत्याला आई जगदंबेने उदंड, निरोगी आणि दीर्घायुष्य द्यावे, हीच आमची प्रार्थना आहे.

भाजप बालाघाट मंडळाने राबवलेल्या या अत्यंत स्तुत्य आणि लोकोपयोगी उपक्रमाचे परिसरातील नागरिकांनी, महिलांनी तसेच समाजधुरिणांनी जोरदार स्वागत केले. पंकजाताईंच्या वाढदिवसाचे औचित्य साधून केवळ भपका न करता असा प्रत्यक्ष सामाजिक दिलासा देणारा उपक्रम राबवल्याबद्दल अशोक रसाळ आणि त्यांच्या सहकाऱ्यांचे सर्वत्र कौतुक होत आहे. या कार्यक्रमास भाजपचे स्थानिक पदाधिकारी, कार्यकर्ते, महिला भगिनी आणि नागरिक मोठ्या संख्येने उपस्थित होते.