१ ऑगस्टपासून बदलणार ‘हे’ महत्त्वाचे नियम; एलपीजी दरांपासून ते आयटीआर अन् रेल्वे तिकिटांपर्यंत तुमच्या खिशावर होणार थेट परिणाम!

मुंबई: जुलै महिना संपत आला असून १ ऑगस्टपासून सर्वसामान्यांच्या जीवनाशी आणि बजेटशी संबंधित अनेक महत्त्वाचे बदल लागू होणार आहेत. स्वयंपाकघरात वापरल्या जाणाऱ्या एलपीजी सिलेंडरच्या किमतींपासून ते क्रेडिट कार्डवरील शुल्क, रेल्वे तिकीट बुकिंगचे नियम आणि प्राप्तीकर (आयटीआर) भरण्याची मुदत अशा विविध क्षेत्रात हे नवे नियम अंमलात येणार आहेत.

१. एलपीजी सिलेंडरच्या दरात बदल शक्य

आंतरराष्ट्रीय स्तरावरील अमेरिका-इराण युद्धाचा परिणाम तेल आणि गॅस पुरवठ्यावर होत आहे. दर महिन्याच्या पहिल्या तारखेप्रमाणे, १ ऑगस्ट रोजी सकाळी तेल कंपन्या १९ किलोच्या व्यावसायिक एलपीजी सिलेंडरच्या नवीन किमती जाहीर करतील. त्यामुळे व्यावसायिक गॅसच्या दरात सुधारणा होण्याची दाट शक्यता वर्तवली जात आहे.

२. रेल्वे तत्काळ तिकीट बुकिंगसाठी ‘टोकन नियम’

पश्चिम मध्य रेल्वेने तत्काळ तिकीट बुकिंगच्या नियमांमध्ये सुधारणा केली आहे. काउंटर बुकिंगवरील गर्दी नियंत्रित करण्यासाठी आणि प्रवाशांच्या सोयीसाठी १ ऑगस्टपासून तत्काळ तिकिटांसाठी टोकन बुकिंग सुरू होण्यापूर्वीच लवकर दिले जातील. यामुळे प्रवाशांना त्यांची पाळी आधीच समजणार आहे.

३. ३१ जुलैनंतर आयटीआर भरल्यास दंड

आर्थिक वर्ष २०२६-२७ साठी आयटीआर (ITR) दाखल करण्याची अंतिम तारीख ३१ जुलै २०२६ आहे. ३१ जुलैपर्यंत आयटीआर न भरल्यास १ ऑगस्टपासून दंड आकारला जाईल. (नॉन-ऑडिट व्यावसायिक आयटीआर-३ व ४ साठी मुदत ३१ ऑगस्ट, तर ऑडिट प्रकरणांसाठी ३१ ऑक्टोबर २०२६ ही अंतिम मुदत आहे).

४. क्रेडिट कार्ड आणि एफडी व्याजदरांमध्ये सुधारणा

१ ऑगस्ट २०२६ पासून अनेक प्रमुख बँका आपल्या क्रेडिट कार्डच्या नियमांमध्ये बदल करू शकतात. यामध्ये रिवॉर्ड पॉइंट्स, प्रोसेसिंग फी आणि इतर शुल्कांचा समावेश आहे. याशिवाय, काही बँका एफडीच्या (FD) व्याजदरांमध्येही सुधारणा करण्याची शक्यता आहे.

५. बँकिंग आणि विम्यात ‘CKYC 2.0’ लागू होणार

ऑगस्ट २०२६ पासून भारतीय बँका आणि विमा कंपन्या ‘सेंट्रल नो युवर कस्टमर २.०’ (CKYC 2.0) ही नवीन ओळख प्रणाली लागू करत आहेत. यामुळे नवीन खाते उघडताना किंवा माहिती अद्ययावत करताना केंद्रीय नोंदणीतील डेटा मिळवण्यासाठी केवळ ग्राहकाच्या संमतीची आवश्यकता असणार आहे.

६. ट्रायचे (TRAI) स्पॅम कॉल्सविरोधात नवीन नियम

दूरसंचार क्षेत्रात फसवणुकीचे संदेश आणि स्पॅम कॉल्स रोखण्यासाठी ट्राय (TRAI) आणि तंत्रज्ञान कंपन्यांकडून १ ऑगस्टपासून अधिक कडक सुरक्षा नियम लागू केले जाण्याची शक्यता आहे.