बॅनरवरूनच ‘गटबाजी’चे संकेत?नगरसेविका मीनल पाटील यांची राजकीय भूमिका चर्चेत

नांदेड :
नांदेड महानगरपालिकेच्या राजकारणात पुन्हा एकदा अंतर्गत गटबाजीची चर्चा रंगू लागली आहे. सांगवी प्रभागातून अपक्ष म्हणून निवडून आलेल्या आणि नुकत्याच शिवसेनेत प्रवेश केलेल्या नगरसेविका मीनल पाटील यांच्या स्वागत बॅनरमुळे हा वाद उफाळून आला आहे.
शिवसेनेचे खासदार डॉ. श्रीकांत शिंदे यांच्या स्वागतासाठी लावण्यात आलेल्या बॅनरवर मीनल पाटील यांनी केवळ त्यांना पाठिंबा देणार्‍या तीन आमदारांचेच फोटो झळकवले आहेत. मात्र, नांदेड उत्तर मतदारसंघाचे शिवसेना आमदार बालाजी कल्याणकर यांचा फोटो जाणीवपूर्वक वगळण्यात आल्याचे स्पष्ट दिसून येते. यामुळे राजकीय वर्तुळात विविध चर्चांना उधाण आले आहे. काही दिवसांपूर्वीच राज्याचे उपमुख्यमंत्री एकनाथ शिंदे यांच्या उपस्थितीत मीनल पाटील यांनी शिवसेनेत प्रवेश केला होता. त्या वेळी शिंदे यांनी स्पष्ट शब्दांत गटबाजी टाळून सर्वांनी एकत्रितपणे काम करण्याचा सल्ला दिला होता. मात्र, सध्याच्या बॅनरमधील मांडणी पाहता, स्थानिक पातळीवरील मतभेद अद्याप कायम असल्याचे संकेत मिळत आहेत. महापालिका निवडणुकीच्या काळात सांगवी प्रभागात झालेल्या राजकीय घडामोडी आणि त्यावेळी निर्माण झालेले तणाव अजूनही शमले नसल्याचे या घटनेतून अधोरेखित होत आहे. विशेषतः, पक्षात प्रवेश केल्यानंतरही काही स्थानिक नेत्यांबाबत अंतर ठेवले जात असल्याची चर्चा कार्यकर्त्यांमध्ये सुरू आहे. या प्रकारामुळे नांदेड उत्तर विधानसभा मतदारसंघात शिवसेनेतील अंतर्गत समन्वयावर प्रश्नचिन्ह निर्माण झाले आहे. बॅनर हा केवळ स्वागताचा भाग असला, तरी त्यातून दिले जाणारे राजकीय संदेश अधिक महत्त्वाचे ठरतात. त्यामुळे या कृतीकडे केवळ योगायोग म्हणून पाहिले जात नसून, त्यामागे स्पष्ट राजकीय भूमिका असल्याचे मानले जात आहे. दरम्यान, आगामी निवडणुकांच्या पार्श्वभूमीवर अशा प्रकारचे संकेत पक्षासाठी धोकादायक ठरू शकतात. गटबाजी वाढल्यास संघटनात्मक ताकद कमी होण्याची शक्यता नाकारता येत नाही. त्यामुळे वरिष्ठ नेतृत्वाने याकडे गांभीर्याने लक्ष देण्याची गरज व्यक्त होत आहे. एकूणच, एका साध्या स्वागत बॅनरने नांदेडमधील शिवसेना राजकारणातील अंतर्गत समीकरणे पुन्हा उघड केली असून, येत्या काळात याचे पडसाद अधिक स्पष्टपणे उमटण्याची शक्यता आहे.