राज्यात पुन्हा राजकीय भूकंपाचे संकेत! ठाकरे-फडणवीसांची मध्यरात्री वर्षावर खलबते ?

मुंबई : राज्याच्या राजकारणात मोठी उलथापालथ घडवू शकणार्‍या एका चर्चेने सध्या जोर धरला आहे. उद्धव ठाकरे आणि देवेंद्र फडणवीस यांच्यात मध्यरात्री ‘वर्षा’ या अधिकृत निवासस्थानी गुप्त भेट झाल्याचा दावा समोर आल्याने राजकीय वर्तुळात खळबळ उडाली आहे. या कथित भेटीमुळे आगामी विधान परिषद निवडणुकीच्या पार्श्‍वभूमीवर नव्या राजकीय समीकरणांची चर्चा सुरू झाली आहे.
या चर्चेला सुरुवात एका सामाजिक माध्यमावरील पोस्टमुळे झाली. काही सूत्रांच्या आधारे दोन्ही नेत्यांमध्ये रात्री उशिरा भेट झाल्याचा दावा करण्यात आला. मात्र, या भेटीचे नेमके स्वरूप, कालावधी किंवा चर्चेचे मुद्दे याबाबत कोणतीही अधिकृत माहिती समोर आलेली नाही. तरीही या दाव्यामुळे राजकीय वातावरण ढवळून निघाले आहे. गेल्या काही वर्षांत ठाकरे आणि फडणवीस यांच्यातील संबंध तणावपूर्ण राहिले आहेत. 2019 मधील मुख्यमंत्रीपदाच्या वादानंतर शिवसेना आणि भाजप युती तुटली होती. त्यानंतर ठाकरे यांनी राष्ट्रवादी काँग्रेस आणि काँग्रेससोबत मिळून महाविकास आघाडीची स्थापना केली. या बदलामुळे राज्यातील सत्तासमीकरणे पूर्णपणे बदलली होती. अलीकडच्या काळात मात्र दोन्ही नेत्यांमध्ये थेट संवाद नसला तरी अप्रत्यक्ष सुसंवादाचे काही संकेत दिसू लागले होते. राज्यात 12 मे रोजी होणार्‍या विधान परिषद निवडणुकीच्या पार्श्‍वभूमीवर सर्वच पक्षांनी रणनीती आखण्यास सुरुवात केली आहे. अशा वेळी ठाकरे-फडणवीस भेटीचा दावा समोर आल्याने या भेटीचा संबंध निवडणूक गणितांशी असण्याची शक्यता व्यक्त केली जात आहे. काही राजकीय विश्‍लेषकांच्या मते, ठाकरे यांनी निवडणूक लढवली किंवा न लढवली, तर त्याचा महाविकास आघाडीच्या समीकरणांवर परिणाम होऊ शकतो. त्याचवेळी, काही तज्ज्ञांच्या मते ठाकरे यांची विधान परिषदेत उपस्थिती ही सत्ताधारी गटासाठीही राजकीय दृष्ट्या उपयुक्त ठरू शकते. अलीकडेच विधान परिषदेतील निवृत्त सदस्यांच्या कार्यक्रमात दोन्ही नेत्यांनी एकमेकांशी संवाद साधत हलक्या फुलक्या शैलीत शेरोशायरी केली होती. त्या प्रसंगी परस्पर आदर व्यक्त झाल्याचे दिसून आले. त्यामुळे दोन्ही नेत्यांमधील संवादाची दारे पूर्णपणे बंद नाहीत, असे संकेत मिळाले होते. या चर्चांदरम्यान संजय राऊत यांनी प्रतिक्रिया देताना सावध भूमिका घेतली. या कथित भेटीबाबत नेमकी माहिती फक्त संबंधित दोन्ही नेत्यांकडेच असल्याचे त्यांनी स्पष्ट केले. त्यामुळे अफवांवर विश्‍वास न ठेवता अधिकृत स्पष्टीकरणाची प्रतीक्षा करण्याचे आवाहन त्यांनी केले. दरम्यान, सध्या तरी या कथित भेटीचा कोणताही अधिकृत तपशील समोर आलेला नाही. मात्र एका दाव्याने राज्याच्या राजकारणात चर्चा रंगवली आहे. या मागे खरोखरच काही राजकीय हालचाल आहे की केवळ अफवा, हे येणार्‍या काळात स्पष्ट होणार आहे. महाराष्ट्रातील सत्तासमीकरणांवर याचा काही परिणाम होतो का, याकडे सर्वांचे लक्ष लागले आहे.

मुख्यमंत्री फडणवीसांनी भेट झाल्याचे नाकारले
या सर्व दाव्यांना फेटाळत मुख्यमंत्री देवेंद्र फडणवीस यांनी स्पष्ट शब्दांत प्रतिक्रिया दिली. उद्धव ठाकरे यांना मला लपून-छपून भेटण्याची गरज नाही. भेट घ्यायची असेल तर ती उघडपणेच होईल, असे ते म्हणाले. माध्यमांशी बोलताना त्यांनी अशा बातम्या पूर्णपणे निराधार असल्याचे सांगत, चुकीची माहिती पसरवणार्‍यांविरोधात कारवाईचा इशाराही दिला.