राजर्षी छत्रपती शाहू महाराजांची सार्वजनिक जयंती बीड शहरात प्रथमच; विविध उपक्रमांचे आयोजन

बीड: आरक्षणाचे जनक आणि सत्यशोधकीय थोर समाजसुधारक राजर्षी छत्रपती शाहू महाराज यांची जयंती ‘सामाजिक न्याय दिन’ म्हणून साजरी करण्यात येते. या पार्श्वभूमीवर बीड शहरात प्रथमच ‘राजर्षी छत्रपती शाहू महाराज सार्वजनिक जयंती उत्सव समिती’ची स्थापना करण्यात आली असून, यावर्षी छत्रपती शाहू महाराजांची १५२ वी जयंती विविध सामाजिक व प्रबोधनात्मक उपक्रमांनी साजरी केली जाणार आहे. हा सोहळा शुक्रवार, दिनांक २६ जून २०२६ रोजी सेवानिवृत्त सीईओ माननीय पी. व्ही. बनसोडे यांच्या अध्यक्षतेखाली पार पडणार आहे.

शुक्रवारी सकाळी ठीक ८.३० वाजता मान्यवर आणि प्रमुख पाहुण्यांच्या हस्ते डॉ. बाबासाहेब आंबेडकर यांच्या पूर्णाकृती पुतळ्याला पुष्पमाला अर्पण करून कार्यक्रमाची सुरुवात होईल. यानंतर, सुशोभित रथातील छत्रपती शाहू महाराजांच्या प्रतिमेचे पूजन केले जाईल आणि समता सैनिकांच्या मानवंदनेने विनम्र अभिवादन करण्यात येईल. बीड शहरातून निघणाऱ्या या भव्य रॅलीमध्ये विविध शाळांतील विद्यार्थी आणि समाजातील विविध क्षेत्रांतील मान्यवर मोठ्या संख्येने सहभागी होणार आहेत.

भव्य रॅलीचा मार्ग आणि अभिवादन

ही रॅली सुरू झाल्यानंतर संत गाडगेबाबा आणि महात्मा बसवेश्वर महाराज यांच्या पुतळ्याला पुष्पमाला अर्पण केली जाईल. तेथून सुभाष रोड मार्गे जात सारडा संकुल येथील क्रांतिसूर्य ज्योतिबा फुले, क्रांतीज्योती सावित्रीबाई फुले, महाराणी अहिल्यादेवी होळकर, तसेच साहित्यरत्न अण्णाभाऊ साठे आणि छत्रपती शिवाजी महाराज यांच्या पुतळ्यांना मान्यवरांच्या हस्ते पुष्पहार अर्पण करून अभिवादन केले जाईल. रॅलीचा समारोप छत्रपती संभाजी महाराज क्रीडांगण येथे होईल, जिथे राजर्षी छत्रपती शाहू महाराजांच्या पुतळ्याला समता सैनिक दलाच्या वतीने मानवंदना देऊन अभिवादन करण्यात येईल.

विचार प्रवर्तक सभा आणि विद्यार्थ्यांचा सन्मान

रॅलीनंतर छत्रपती संभाजी महाराज क्रीडांगण परिसरात प्रमुख मान्यवरांच्या उपस्थितीत विचार प्रवर्तक सभेचे आयोजन करण्यात आले आहे. या प्रबोधनात्मक सभेनंतर उपस्थित विद्यार्थ्यांना अल्पोपहार आणि शालेय साहित्याचे वाटप केले जाईल. राष्ट्रगीताने या संपूर्ण सोहळ्याची सांगता होणार आहे.

या ऐतिहासिक आणि पहिल्या सार्वजनिक जयंती महोत्सवासाठी बीड शहरातील सर्व समाजातील बहुसंख्य नागरिकांनी मोठ्या संख्येने उपस्थित राहून राजर्षी छत्रपती शाहू महाराजांना अभिवादन करावे, असे नम्र आवाहन राजर्षी छत्रपती शाहू महाराज सार्वजनिक जयंती उत्सव समिती, बीड शहर यांच्या वतीने करण्यात आले आहे.