जंतर-मंतर आंदोलनावरील आक्षेपार्ह विधानप्रकरणी मोहनदास यांना अटक

कोची : नवी दिल्लीतील जंतर-मंतर येथे नीट परीक्षेतील कथित प्रश्नपत्रिका गळतीविरोधात आंदोलन करणाऱ्या विद्यार्थ्यांबाबत आक्षेपार्ह आणि चिथावणीखोर विधान केल्याप्रकरणी केरळ पोलिसांनी उजव्या विचारसरणीचे भाष्यकार आणि यूट्यूबवरील वक्त्ये टी. जी. मोहनदास यांना अटक केली आहे. त्यांच्या वक्तव्याचा ध्वनिचित्रफितीच्या माध्यमातून प्रसार करण्यात आल्याचा आरोप आहे.

पोलिसांच्या माहितीनुसार, मोहनदास यांनी २४ आणि २५ जुलै रोजी “पथरिक” या यूट्यूब वाहिनीवर काही ध्वनिचित्रफिती प्रसारित केल्या होत्या. या ध्वनिचित्रफितींमध्ये जंतर-मंतरवरील आंदोलनाबाबत अत्यंत आक्षेपार्ह भाष्य करण्यात आल्याचा आरोप तक्रारीत करण्यात आला आहे. मोहनदास यांनी आंदोलनादरम्यान सामूहिक अत्याचाराच्या घटना घडू शकतात आणि त्याबाबत तक्रारी केल्या जाणार नाहीत, अशा स्वरूपाचे अत्यंत आक्षेपार्ह विधान केल्याचा आरोप आहे. त्यांच्या या वक्तव्यामुळे महिला आंदोलकांचा अवमान झाला असून, समाजात भीती आणि अस्वस्थता निर्माण करण्याचा प्रयत्न झाल्याचे तक्रारीत नमूद करण्यात आले आहे.

मोहनदास यांनी आपण त्या ठिकाणी असतो तर जंतर-मंतर परिसरात संचारबंदी लागू केली असती, असेही म्हटल्याचा आरोप आहे. आंदोलकांनी तिथून हटण्याचे आदेश पाळले नाहीत, तर त्यांच्यावर गोळीबार करण्याचे आदेश दिले असते, असेही त्यांनी ध्वनिचित्रफितीत म्हटल्याचे पोलिसांनी सांगितले.

या विधानांची गंभीर दखल घेत पोलिसांनी मोहनदास यांच्याविरोधात गुन्हा दाखल करून तपास सुरू केला. रविवारी रात्री उशिरा पोलिसांचे पथक कोची येथील त्यांच्या निवासस्थानी पोहोचले. त्यानंतर त्यांना तिरुवनंतपुरम येथील सायबर पोलीस ठाण्यात नेण्यात आले. मध्यरात्रीनंतर त्यांना अटक करण्यात आली.

डिजिटल उपकरणांची तपासणी

तपासाचा भाग म्हणून पोलिसांनी मोहनदास यांच्याकडील काही डिजिटल उपकरणे ताब्यात घेतली आहेत. ध्वनिचित्रफित तयार करण्यासाठी आणि ती प्रसारित करण्यासाठी कोणत्या उपकरणांचा वापर झाला, याची माहिती मिळवण्यासाठी ही उपकरणे न्यायवैद्यक तपासणीसाठी पाठवण्यात येणार आहेत.