अमेरिकेविरुद्ध इराणची युद्धपुकार; कुवेत मधील अमेरिकन लष्करी तळावर क्षेपणास्त्रांचा मारा

तेहरान: पश्चिम आशियातील तणाव आता अधिक गंभीर वळणावर पोहोचला असून अमेरिका आणि इराण यांच्यातील संघर्षाने उघड्या युद्धाचे स्वरूप धारण केल्याचे चित्र दिसत आहे. अमेरिकेने इराणमधील विविध लष्करी ठिकाणांवर हल्ल्यांची मालिका सुरू ठेवल्यानंतर इराणनेही जोरदार प्रत्युत्तर देत कुवेत मधील अमेरिकन लष्करी तळावर क्षेपणास्त्रांचा मारा केला आहे. या पार्श्वभूमीवर इराणचे अध्यक्ष मसूद पेझेश्कियान यांनी देश युद्धस्थितीत प्रवेश केल्याची घोषणा केली असून, नागरिकांनी दीर्घकालीन संघर्षासाठी मानसिक तयारी ठेवावी, असे आवाहन केले आहे.

इराणी लष्कराने मंगळवारी पहाटे कुवेत मधील अमेरिकेच्या महत्त्वाच्या लष्करी तळाला लक्ष्य करून भूपृष्ठावरून डागली जाणाऱ्या क्षेपणास्त्रांचा मारा केल्याचा दावा केला आहे. या कारवाईत अमेरिकेच्या अत्याधुनिक दूरमारधक क्षेपणास्त्र प्रणालींना लक्ष्य करण्यात आल्याचेही इराणने म्हटले आहे. अध्यक्ष मसूद पेझेश्कियान यांनी देशाला उद्देशून केलेल्या संदेशात, “इराण आता पूर्ण स्वरूपाच्या युद्धाचा सामना करत आहे. हे वास्तव स्वीकारून राष्ट्राने एकजुटीने उभे राहण्याची गरज आहे. कोणत्याही परिणामांना सामोरे जाण्यासाठी आपण सज्ज राहिले पाहिजे,” असे स्पष्ट केले.

इराणच्या सरकारी वृत्तसंस्थेने लष्कराच्या हवाल्याने दिलेल्या माहितीनुसार, कुवेत मधील आरिफजान लष्करी तळावर तैनात असलेल्या अमेरिकेच्या अत्याधुनिक दूरमारधक क्षेपणास्त्र प्रक्षेपण प्रणालींना लक्ष्य करण्यात आले. ही प्रणाली वेगाने स्थान बदलून अचूक मारा करण्यास सक्षम मानली जाते. या कारवाईमुळे अमेरिकेच्या हल्ला करण्याच्या क्षमतेला धक्का बसल्याचा दावा इराणने केला आहे. मात्र, या दाव्याची स्वतंत्रपणे पुष्टी झालेली नाही. कुवेत शहराच्या दक्षिणेकडे असलेला आरिफजान लष्करी तळ हा अमेरिकेच्या हवाई दल, नौदल, भूदल तसेच सागरी सुरक्षा दलासाठी अत्यंत महत्त्वाचा मानला जातो. पश्चिम आशियातील अनेक लष्करी कारवायांचे नियोजन आणि रसद व्यवस्था याच तळावरून केली जाते. त्यामुळे या तळावरील हल्ल्याला मोठे सामरिक महत्त्व प्राप्त झाले आहे.

इराणवरील हल्ले सलग दहाव्या दिवशीही सुरूच

अमेरिकेने इराणवरील हवाई कारवाईही सुरूच ठेवली आहे. सोमवारी उशिरा रात्री अमेरिकन सैन्याने इराणमधील विविध लष्करी तळांवर नव्या हल्ल्यांची मालिका सुरू केली. सलग दहाव्या रात्री करण्यात आलेल्या या कारवाईचा उद्देश इराणच्या लष्करी क्षमतेला आणखी कमकुवत करणे असल्याचे अमेरिकेने स्पष्ट केले आहे.