नाशिकमध्ये गोदावरी दुथडी भरून वाहिली

नाशिक : गेल्या काही दिवसांपासून दडी मारून बसलेल्या पावसाने नाशिक शहर आणि जिल्ह्यात आता जोरदार कमबॅक केले आहे. या मुसळधार पावसामुळे संपूर्ण नाशिक शहर जलमय झाले असून, गोदावरी नदीला यंदाच्या हंगामातील पहिला मोठा पूर आला आहे. नदीच्या पाणीपातळीत झपाट्याने वाढ होत असून, पुराचे पाणी रामकुंड परिसरातील प्रसिद्ध ’दुतोंड्या मारुती’च्या छातीपर्यंत पोहोचले आहे. रामसेतू पुलालाही पाण्याचा स्पर्श झाला आहे. गोदामाईचे हे रौद्र रूप आणि हंगामातील पहिला पूर पाहण्यासाठी नाशिककरांनी नदीकाठी मोठी गर्दी केली आहे.