कोल्हापुरात तरुणीवर सामूहिक अत्याचार; व्हिडिओ व्हायरल करण्याची धमकी देणारे चारही नराधम गजाआड

कोल्हापूर : कोल्हापूर जिल्ह्यातील राधानगरी परिसरात एका महाविद्यालयीन तरुणीवर चार जणांनी सामूहिक अत्याचार केल्याची अत्यंत धक्कादायक घटना उघडकीस आली आहे. आरोपींनी या पीडित तरुणीचे अश्लील व्हिडिओ आणि फोटो समाजमाध्यमांवर (Social Media) व्हायरल करण्याची धमकी देत, तिच्यावर गेल्या अनेक महिन्यांपासून वारंवार शारीरिक अत्याचार केल्याचे प्राथमिक तपासात निष्पन्न झाले आहे. या भयंकर प्रकारामुळे संपूर्ण कोल्हापूर जिल्ह्यात मोठी खळबळ उडाली आहे.

पोलिसांनी या प्रकरणी तत्परता दाखवत राधानगरी येथील आदित्य शेटके, पवनगिरी पालकर, विक्रम पाटील आणि रणजीत मुधोळकर या चार संशयित आरोपींना अटक केली आहे. न्यायालयाने या चारही आरोपींना चार दिवसांची पोलीस कोठडी सुनावली आहे. या घटनेचा पुढील तपास पोलीस करत आहेत.