स्त्रीवाद फक्त महिलांसाठीच नाही, तर पुरुषांसाठीही आहे’; अभिनेत्री सान्या मल्होत्राचे विधान चर्चेत

मुंबई: बऱ्याच अभिनेत्री अनेकदा स्त्रीवादावर मनमोकळेपणाने बोलताना दिसतात. नुकत्याच दिलेल्या एका मुलाखतीत अभिनेत्री सान्या मल्होत्राने स्त्रीवाद हा केवळ महिलांसाठीच नव्हे तर पुरुषांसाठीही असतो, असे मत व्यक्त केले आहे. सान्या मल्होत्राच्या या विधानाची सध्या चित्रपटसृष्टीत आणि सोशल मीडियावर जोरदार चर्चा सुरू आहे.

अभिनेत्री सान्या मल्होत्राने काही वर्षांपूर्वी आलेल्या आमिर खानच्या ‘दंगल’ या चित्रपटातून आपल्या चित्रपट कारकिर्दीची सुरुवात केली. पुढे १० वर्षांच्या प्रवासात सान्याने चित्रपट आणि ओटीटी विश्वात एक प्रभावी व सक्षम अभिनेत्री म्हणून स्वतःची वेगळी ओळख निर्माण केली. बाह्य दबावांना बळी न पडता भूमिका निवडण्याची तिची पद्धत विशेष कौतुकास्पद मानली जाते. दमदार अभिनय करण्यासोबतच पुरुषप्रधान मानल्या जाणाऱ्या चित्रपट उद्योगात सान्याची ठाम भूमिका महिलांना सक्षम आणि ताकदवान स्वरूपात मांडण्यास मदत करते.

सान्या मल्होत्राने अलीकडेच सांगितले की, ‘Mrs’ सारख्या समीक्षकांनी गौरवलेल्या चित्रपटांद्वारे महिलांना सक्षम करणे हा तिचा मुख्य उद्देश आहे. एका मुलाखतीत सान्याने स्त्रीवादाबद्दलची तिची भूमिका स्पष्ट करत हा विचार केवळ महिलांपुरता मर्यादित नसल्याचे सांगितले.

“मी स्वतःला खूप भाग्यवान समजते. मी खूप मेहनत करते आणि आज माझ्या स्वप्नातील आयुष्य जगत आहे. मला नेहमीच अभिनेत्री व्हायचे होते. मला मिळणाऱ्या संधींसाठी आणि पडद्यावर साकारायला मिळणाऱ्या अप्रतिम व्यक्तिरेखांसाठी मी अत्यंत कृतज्ञ आहे. अभिनेत्री म्हणून माझ्या व्यासपीठाचा योग्य प्रकारे उपयोग करत असल्याचा मला आनंद आहे,” असे सान्या म्हणाली.

तिच्यातील स्त्रीवादी विचार कसे विकसित झाले याबद्दल बोलताना सान्या म्हणाली, “मी आधी स्त्रीवादी नव्हते. खरं तर, त्याचा नेमका अर्थही मला माहीत नव्हता. मी मुंबईला आले, अधिक वाचू लागले आणि मला जाणवले की समाजात महिलांबद्दल सहानुभूतीची कमतरता आहे. लोकांना आम्ही मैत्री करावी किंवा कोणत्याही गोष्टीचे नेतृत्व करावे असे वाटत नाही. हळूहळू मला जाणवू लागले की ही पितृसत्ताक व्यवस्था माझ्या कुटुंबातील महिलांमध्ये आणि मैत्रिणींमध्येही अस्तित्वात आहे. लिली सिंगच्या ‘Shame-Less’ या पॉडकास्टमध्ये बोलताना सान्याने हे विचार मांडले.

ती पुढे म्हणाली, “स्त्रीवाद हा फक्त महिलांसाठी नाही, तो पुरुषांसाठीही आहे. जेव्हा त्यांना जाणवते की पितृसत्ताक व्यवस्था त्यांनाही त्यांच्या भावना दडपायला भाग पाडते किंवा त्यांच्यावर विविध दबाव आणते, तेव्हा त्यांना या व्यवस्थेचा खरा परिणाम समजतो.”

‘Mrs’ चित्रपटाच्या परिणामाबद्दल सांगताना ती म्हणाली, “जेव्हा मी ‘Mrs’ चित्रपट केला, तेव्हा अनेक महिलांनी माझ्याशी संपर्क साधला. महिला मला भेटून सांगतात की ही त्यांचीच कहाणी आहे. हे ऐकून मला दुःखही होते आणि रागही येतो. आपण महिलांना आई म्हणून एका उंच स्थानावर ठेवतो, त्यांच्याकडून सतत त्यागाची अपेक्षा करतो आणि अनेकदा त्याची दखलही घेत नाही.”

मोठ्या पडद्यावर सशक्त महिला व्यक्तिरेखांची धुरा वाहणारी सान्या मल्होत्रा शेवटची ‘बंदर’ मध्ये दिसली होती. आता ती आगामी ‘सुंदर पूनम’ या चित्रपटात पुन्हा एकदा एका वेगळ्या आणि आव्हानात्मक भूमिकेत प्रेक्षकांच्या भेटीस येणार आहे.