पुणे-मुंबई द्रुतगती मार्गावर आठ टन गोमांस पकडले

पुणे : गोमांसची वाहतूक करणार्‍या टेम्पोचालकाला देहूरोड पोलिसांनी अटक केली आहे. पुणे-मुंबई द्रुतगती मार्ग किवळे येथे ही कारवाई करण्यात आली. आठ टन गोमांसासह 27 लाखांचा मुद्देमाल पोलिसांनी जप्त केला आहे.
टेम्पोत पोलिसांची दिशाभूल करण्यासाठी कांदा-बटाट्याच्या गोणी ठेवण्यात आल्या होत्या. या गुन्ह्याबाबत गोरक्षक शिवशंकर राजेंद्र स्वामी यांनी देहूरोड पोलिसात तक्रार दिली आहे. टेम्पोचालक दीपक रफिक पैगंबर आणि टेम्पोमालक शौकत हुसेन यांच्याविरुद्ध गुन्हा दाखल केला असून पैकी, दीपकला अटक करण्यात आली आहे. पोलिसांनी दिलेल्या माहितीनुसार, पहाटेच्या सुमारास खासगी टेम्पोतून पुणे-मुंबई द्रुतगती मार्गावरून मुंबईला गोमांस घेऊन जाणार असल्याची माहिती गोरक्षक शिवशंकर राजेंद्र स्वामी यांना मिळाली. देहूरोड पोलीस आणि गोरक्षक यांनी तो टेम्पो किवळे येथे सापळा लावून पकडला. टेम्पोच्या आत कांदा आणि बटाट्याच्या गोणी होत्या. मग, आतमध्ये गव्हाचा भुसा असलेल्या पन्नास गोणी आढळल्या. त्याखाली आठ टन गोमांस सापडले. धाराशिव येथून मुंबईला हे गोमांस घेऊन जात असल्याची माहिती पोलीस तपासात पुढे आली आहे. टेम्पोचालक दीपक आणि टेम्पोमालक शौकतच्या विरोधात भा.दं.वि.कलम 429 सह महाराष्ट्र प्राणी संरक्षण अधिनियम 1995 चे कलम 5 (क) , 9(अ) (ब) प्रमाणे गुन्हा दाखल करण्यात आला आहे. पैकी, दीपकला देहूरोड पोलिसांनी अटक केली आहे.