पुणे : पुण्यातील हडपसर परिसरातून आगीची एक अत्यंत भीषण घटना समोर आली होती. गोंधळे नगर भागात सिलेंडरचा मोठा स्फोट होऊन लागलेल्या आगीत अनेक दुकाने ज
पुणे : पुण्यातील हडपसर परिसरातून आगीची एक अत्यंत भीषण घटना समोर आली होती. गोंधळे नगर भागात सिलेंडरचा मोठा स्फोट होऊन लागलेल्या आगीत अनेक दुकाने जळून खाक झाली आहेत. या आगीची तीव्रता इतकी मोठी होती की, आगीच्या ज्वाळा थेट इमारतीच्या तिसऱ्या मजल्यापर्यंत पोहोचल्या होत्या.
हडपसरमधील गोंधळे नगर परिसरात कालव्याच्या कडेला असलेल्या एका सोसायटीतील दुकानांना अचानक आग लागली होती. स्थानिकांनी दिलेल्या माहितीनुसार, एका वडापावच्या दुकानातील सिलेंडरचा भीषण स्फोट झाला आणि पाहता पाहता आगीने रौद्र रूप धारण केले. या आगीत ओळीने असलेली ४ ते ५ दुकाने पूर्णपणे जळून खाक झाली आहेत.
आगीमध्ये फ्रिज, शेड, स्टेशनरी साहित्यासह व्यावसायिकांचे लाखोंचे नुकसान झाले आहे. रस्ता अरुंद असल्याने आणि घटनास्थळी बघ्यांची मोठी गर्दी जमल्याने सुरुवातीला अग्निशमन दलाच्या गाड्यांना पोहोचण्यास अडथळा निर्माण झाला. मात्र, स्थानिक नागरिक, महिला आणि सामाजिक कार्यकर्त्यांनी तातडीने धाव घेत मदतकार्य सुरू केले.
अग्निशमन दलाच्या जवानांनी अथक प्रयत्नांनंतर आगीवर नियंत्रण मिळवले आहे. सुदैवाने या घटनेत कोणतीही जीवितहानी झाल्याचे वृत्त नाही, परंतु छोट्या व्यावसायिकांचे मोठे आर्थिक नुकसान झाले आहे. भरवस्तीत झालेल्या या स्फोटामुळे परिसरात काही काळ भीतीचे वातावरण पसरले होते.
पुण्यात पुन्हा एकदा सिलेंडर स्फोटाच्या घटनेने सुरक्षेचा प्रश्न ऐरणीवर आला आहे. अरुंद रस्ते आणि आगीच्या वेळी होणारी गर्दी प्रशासनासाठी मोठे आव्हान ठरत असल्याचे या घटनेतून पुन्हा स्पष्ट झाले आहे.
COMMENTS