तमिळनाडूचे मुख्यमंत्री विजय यांना धमकी दिल्याचे प्रकरण तापले; DMK आमदार मार्कंडेयन यांचा जामीन अर्ज फेटाळला

चेन्नई: तमिळनाडूचे मुख्यमंत्री सी. जोसेफ विजय यांना जाहीर सभेत धमकी दिल्याप्रकरणी सत्ताधारी DMK पक्षाचे विलाथिकुलमचे आमदार जी. व्ही. मार्कंडेयन (GV Markandeyan) यांना न्यायालयात मोठा झटका बसला आहे. थुथुकुडी न्यायालयाने त्यांचा जामीन अर्ज फेटाळत त्यांना ३ ऑगस्टपर्यंत न्यायालयीन कोठडी सुनावली आहे.

थुथुकुडीच्या न्यायदंडाधिकारी सुमती यांच्यासमोर या प्रकरणावर बुधवारी सुनावणी झाली. सरकारी पक्षाने थेट राज्याच्या मुख्यमंत्र्यांनाच हातपाय तोडण्याची धमकी दिल्याचे सांगत जामीनाला कडाडून विरोध दर्शवला. दुसरीकडे, मार्कंडेयन यांच्या वकिलाने दावा केला की, ते गेल्या ११ तासांपासून पोलिसांच्या ताब्यात असून त्यांची सलग चौकशी झाली आहे. ते लोकप्रतिनिधी असल्याने त्यांना कोठडीत ठेवण्याची गरज नाही, असा युक्तिवाद करण्यात आला. मात्र, दोन्ही बाजूंचे म्हणणे ऐकल्यानंतर न्यायालयाने जामीन अर्ज फेटाळून लावला.

गेल्या शनिवारी कोविलपट्टी येथे आयोजित एका भव्य सभेत बोलताना आमदार मार्कंडेयन यांचा ताबा सुटला होता. त्यांनी भरसभेत मुख्यमंत्री विजय यांचे हातपाय तोडण्याचे प्रक्षोभक वक्तव्य केले. या भाषणाचा व्हिडिओ व्हायरल झाल्यानंतर पोलिसांनी तातडीने भारतीय न्याय संहितेच्या (BNS) विविध कलमांनुसार गुन्हा दाखल करून त्यांना ताब्यात घेतले. सखोल चौकशीनंतर त्यांना न्यायालयात हजर करण्यात आले असता ३ ऑगस्टपर्यंत कोठडीत ठेवण्याचे आदेश देण्यात आले आहेत. या घटनेमुळे तमिळनाडूच्या राजकारणात मोठी खळबळ उडाली आहे.