माथेरान घाटात कोसळला महाकाय दगड; मोठा अपघात टळला, काही काळ वाहतूक विस्कळीत

रायगड: नेरळ-माथेरान घाट परिसरात सुरू असलेल्या मुसळधार पावसामुळे डोंगरकडा सैल झाल्याने घाटमार्गावर एक महाकाय शिळा अचानक रस्त्यावर कोसळली. या घटनेमुळे काही काळ वाहतूक विस्कळीत झाली होती. मात्र, शिळा कोसळली त्यावेळेस मार्गावर कोणतेही वाहन किंवा पर्यटक नसल्याने सुदैवाने मोठी जीवितहानी टळली आहे.

सततच्या पावसामुळे घाटातील डोंगरकड्यांवरून माती, दगड आणि लहान-मोठ्या दरडी कोसळण्याच्या घटनांमध्ये वाढ झाली आहे. अशीच मोठी शिळा रस्त्यावर येऊन पडल्याने वाहतूक काही वेळेसाठी थांबवावी लागली. घटनेची माहिती मिळताच संबंधित यंत्रणेचे कर्मचारी तातडीने घटनास्थळी दाखल झाले. रस्ता साफ करून शिळा हटवण्याचे काम युद्धपातळीवर हाती घेण्यात आले आणि त्यानंतर मार्ग पुन्हा वाहतुकीसाठी खुला करण्यात आला.

माथेरान घाटमार्ग हा पर्यटकांसह स्थानिक नागरिकांसाठी अत्यंत महत्त्वाचा संपर्कमार्ग आहे. पावसाळ्यात या परिसरात दरड कोसळण्याचा धोका वाढत असल्याने प्रवाशांनी अधिक सावधगिरी बाळगण्याचे आवाहन प्रशासनाने केले आहे. विशेषतः मुसळधार पावसाच्या काळात तसेच रात्रीच्या वेळी अनावश्यक प्रवास टाळावा, असेही प्रशासनाने स्पष्ट केले आहे.

दरम्यान, स्थानिक नागरिकांनी घाटातील धोकादायक ठिकाणांचा तातडीने भू-अभ्यास करून कायमस्वरूपी संरक्षणात्मक उपाययोजना राबवण्याची मागणी केली आहे. डोंगरकडे सुरक्षित करण्यासाठी संरक्षक जाळ्या, खडकांना मजबूत आधार देणारी यंत्रणा आणि इतर आवश्यक उपाय त्वरित अमलात आणावेत, अशी त्यांची मागणी आहे. या घटनेमुळे माथेरान घाटमार्गाच्या सुरक्षेचा प्रश्न पुन्हा एकदा ऐरणीवर आला आहे. पावसाळ्यात संभाव्य दुर्घटना टाळण्यासाठी नियमित पाहणी, धोकादायक भागांचे निरीक्षण आणि प्रतिबंधात्मक उपायांवर प्रशासनाने अधिक भर देण्याची गरज व्यक्त केली जात आहे.