आरोग्य संशोधन संस्थेमध्ये सातारा जिल्ह्यातील दोघांची निवड

म्हसवड येथील शास्त्रज्ञ डॉ. दिपक पिंजारी; वाई तालुक्यातील उद्योजक विजय भोसले

म्हसवड / वार्ताहर : कोरोना सारख्या भविष्यात उद्भवणार्‍या महामारी सारख्या संकटाचा सामना करण्यासाठी राज्य सरकारने आरोग्य आणि संशोधन (इन्स्टिट्यूट फॉर हेल्थ केअर रिसर्च अँड इनोव्हेटिव्ह बायो सेफ्टी लॅबोरेटरी) संस्था स्थापन करण्याचा महत्वपुर्ण निर्णय घेतला आहे. या संशोधन संस्थेत माण तालुक्यातील म्हसवड येथील जागतिक पातळीवरील शास्त्रज्ञ डॉ. दिपक पिंजारी आणि वाई तालुक्यातील उद्योजक विजय भोसले यांची निवड झाली आहे.

सध्या सर्वत्र कोरोनाची साथीचे थैमान सुरु आहे. भविष्यात आणखी वेगवेळ्या साथीच्या संभाव्य संकटाचा सामना करण्यासाठी महाराष्ट्र शासनाने स्वतःची आरोग्य आणि संशोधन संस्था उभारावी, अशी संकल्पना सातारा जिल्ह्यामधील म्हसवड येथील डॉ. दीपक पिंजारी व वाई तालुक्यातील शिरगाव येथील विजय भोसले यांनी सरकारपुढे मांडली होती. कोरोनाच्या साथीने राज्य व देशभरात घातलेले थैमान पाहता या संकल्पनेत हळूहळू मानांकित विद्यापीठांचे कुलगुरू, कुलसचिव, संचालक या विषयातील तज्ञ, सरकारी अधिकारी, महाराष्ट्र सरकारचे आरोग्य खाते यांच्यासोबत चर्चा सुरु झाली. या संकल्पनेचा पहिला प्रस्ताव दि. 27 एप्रिल 2020 रोजी राज्याचे आरोग्य मंत्री राजेश टोपे यांना सादर करण्यात आला. त्यातून एक नवीन संस्था स्थापन करण्याबाबत चर्चा चालू झाली. त्यानंतर राजेश टोपे यांनी यासाठी लागणार्‍या उपाय योजनासाठी माहिती गोळा करावयाला सांगितली. 

या बैठकीत या नियोजित संस्थेच्या संकल्पनेबद्दल विजय भोसले यांनी उपस्थितांना संक्षिप्त स्वरूपात माहिती दिली. डॉ. समीर कुलकर्णी यांनी संस्था कोणकोणत्या क्षेत्रात काम करेल. तसेच डॉ. दिपक पिंजारी यांनी ही संस्था कशा प्रकारे काम करेल, त्यास लागणार्‍या सामुग्री, आवश्यक असणारे बांधकाम आणि लागणारी आर्थिक तरतूदीबाबत सविस्तर माहिती दिली.  

लवकरच महाराष्ट्राला व पर्यायाने देशाला खूप चांगली संशोधन संस्था BSL4 (bio-safety laboratory) 4  जागतिक दर्जाची संस्था उपलब्ध होईल. त्यातून अशा प्रकारचे संशोधन महामारी आणि तत्सम विषयावर खूप मोठ्या प्रमाणात संशोधन होऊन भारत हा जगातील एक बलशाली देश बनण्याकडे वाटचाल करू शकतो. तसेच जगभरातील भारतीयांना आपल्या देशांमध्ये संशोधन करण्यासाठी एक उत्कृष्ट प्लॅट फॉर्म यामधून मिळेल, असा विश्‍वास व्यक्त केला.