टीव्ही अभिनेत्री संचिता उगलेची वयाच्या अवघ्या ३० व्या वर्षी गळफास लावून आत्महत्या; मनोरंजन विश्वाला मोठा धक्का

मुंबई : प्रसिद्ध टीव्ही अभिनेत्री संचिता उगले हिने आत्महत्या केल्याची धक्कादायक घटना समोर आली असून यामुळे मनोरंजन विश्वात एकच खळबळ उडाली आहे. संचिता आपल्या राहत्या घरात मृत अवस्थेत आढळून आली. अवघ्या ३० व्या वर्षी तिने आपले जीवन संपवल्यामुळे तिचे चाहते आणि सहकलाकारांना मोठा धक्का बसला असून सर्व स्तरांतून हळहळ व्यक्त होत आहे.

मिळालेल्या माहितीनुसार, संचिता उगले ही आपल्या पालकांसह आणि बहिणीसह नालासोपारा येथे वास्तव्यास होती. रविवारी सायंकाळच्या सुमारास ही घटना घडल्याचे सांगितले जात आहे. घटना घडली त्या वेळी ती घरात एकटीच होती, अशी माहिती पोलिसांनी दिली आहे. या आत्महत्येमागचे नेमके कारण अद्याप स्पष्ट झालेले नाही. पोलिसांनी घटनेचा तपास सुरू केला असून कुटुंबाकडून अद्याप कोणतीही अधिकृत प्रतिक्रिया आलेली नाही.

संचिता उगले हिने टीव्ही मालिकांमधून अभिनय क्षेत्रात आपली एक वेगळी ओळख निर्माण केली होती. लोकप्रिय हिंदी मालिका “कुमकुम भाग्य” मधील तिच्या भूमिकेमुळे तिला विशेष प्रसिद्धी मिळाली. त्यानंतर “वागळे की दुनिया” या मालिकेतही तिने लक्षवेधी काम केले होते. याशिवाय एका मनोरंजन वाहिनीवरील “दिलवाले दुल्हनिया ले जायेंगे” या मालिकेत तिने महत्त्वपूर्ण भूमिका साकारली होती. मालिकांबरोबरच तिने चित्रपट आणि वेब विश्वातही काम केले होते. ऐतिहासिक पार्श्वभूमी असलेल्या “छावा” या चित्रपटात तिने महाराणी ताराराणी यांच्या बालपणाची भूमिका साकारली होती, तसेच अभिनेता मनोज बाजपेयी यांच्या “सायलेन्स २” या चित्रपटातही तिने महत्त्वाची भूमिका निभावली होती. संचिता सोशल मीडियावर खूप सक्रिय होती, तिच्या अशा अचानक जाण्याने चाहत्यांवर दुःखाचा डोंगर कोसळला आहे.