पंढरपुरात खळबळ; किरकोळ वादातून रिक्षाचालकाची निर्घृण हत्या, रेल्वे ट्रॅकवर आढळला छिन्नविच्छिन्न मृतदेह

सोलापूर/पंढरपूर : सोलापूर जिल्ह्यातील पंढरपूर शहरात एका रिक्षाचालकाची किरकोळ वादातून अत्यंत निर्घृणपणे हत्या करण्यात आल्याची धक्कादायक घटना उघडकीस आली आहे. रोहित मधुकर कोरे असे हत्या झालेल्या रिक्षाचालक तरुणाचे नाव आहे. या भयानक हत्याकांडामुळे पंढरपूर आणि परिसरात मोठी दहशत निर्माण झाली आहे.

मिळालेल्या प्राथमिक माहितीनुसार, आरोपींनी रोहितची हत्या केल्यानंतर त्याचे पाय घराच्या दरवाजाला अडकवून ठेवले होते. त्यानंतर या तरुणाचा मृतदेह पंढरपूर येथील रेल्वे ट्रॅकवर छिन्नविच्छिन्न अवस्थेत आढळून आला. हत्येच्या या थरारक घटनेची माहिती मिळताच पंढरपूर शहर पोलीस तातडीने घटनास्थळी दाखल झाले असून त्यांनी मृतदेह ताब्यात घेतला आहे.

पोलिसांनी घटनास्थळाचा पंचनामा केला असून अज्ञात मारेकऱ्यांचा शोध घेण्यासाठी पथके रवाना करण्यात आली आहेत. किरकोळ वादाचे नेमके कारण काय होते आणि या हत्येमागे कोण आहे, याचा सखोल तपास पंढरपूर पोलीस करत आहेत.