युक्रेनवर रशियाचे क्षेपणास्त्र, ड्रोन हल्लेअनेक शहरांमध्ये हाहाकार; वीजपुरवठाही विस्कळीत

कीव : रशियाने युक्रेनमधील विविध भागांवर केलेल्या क्षेपणास्त्र आणि मानवरहित विमानांच्या सलग हल्ल्यांमुळे मोठी जीवितहानी झाली असून किमान 12 जणांचा मृत्यू झाला आहे, तर 40 हून अधिक नागरिक जखमी झाले आहेत. युक्रेनचे राष्ट्राध्यक्ष वोलोदिमिर झेलेन्स्की यांनी या कारवायांचा तीव्र निषेध करत त्यांना अत्यंत भीषण आणि अमानवी स्वरूपाचे हल्ले असे संबोधले आहे.
गेल्या चार वर्षांपासून सुरू असलेल्या रशिया-युक्रेन संघर्षात नागरिकांवर मोठे संकट ओढवले आहे. आंतरराष्ट्रीय स्तरावरील उपलब्ध आकडेवारीनुसार, या युद्धात आतापर्यंत हजारो निष्पाप नागरिकांचा बळी गेला असून पायाभूत सुविधांचेही मोठे नुकसान झाले आहे. द्निप्रो शहरात रशियन क्षेपणास्त्रांनी महत्त्वाच्या नागरी आणि पायाभूत सुविधांना लक्ष्य केले. या हल्ल्यात सहा नागरिकांचा मृत्यू झाला, तर 29 जण जखमी झाले. बचाव पथकांनी तातडीने मदतकार्य सुरू केले असून अनेक इमारतींचे नुकसान झाल्याची माहिती समोर आली आहे. झापोरिझ्झिया येथे मानवरहित विमानाच्या धडकेमुळे एका प्रवासी बसला आग लागली. या घटनेत एका लहान मुलासह तीन जणांचा मृत्यू झाला, तर सहा जण जखमी झाले. स्थानिक प्रशासनाने या घटनेला नागरिकांना लक्ष्य करणारी गंभीर कारवाई असे म्हटले आहे. सुमी प्रदेशात झालेल्या हल्ल्यांमध्ये एका वृद्ध महिलेसह दोन नागरिकांचा मृत्यू झाला. खार्किव्ह शहरात दिवसा झालेल्या हल्ल्यात एका व्यक्तीचा मृत्यू झाला असून पाच जण जखमी झाले आहेत. याशिवाय देशातील आणखी सहा भागांमध्येही प्राणघातक हल्ल्यांची नोंद झाली आहे.