कणकवलीत बांधकाम व्यावसायिकाचा गूढ मृत्यू; डोक्याला गंभीर जखम, रक्ताचे डाग आढळल्याने खळबळ

सिंधुदुर्ग : जिल्ह्यातील कणकवली शहरात एका नामांकित बांधकाम व्यावसायिकाचा संशयास्पद मृत्यू उघडकीस आल्याने परिसरात एकच खळबळ उडाली आहे. सुशांत दळवी असे मृत व्यक्तीचे नाव असून, त्यांचा मृतदेह शहरातील मुरेडोंगरी भागातील मोहनमळा परिसरात आढळून आला.
शुक्रवारी सकाळच्या सुमारास काही कामगार नदीपात्राकडे जात असताना रस्त्याच्या कडेला हा मृतदेह दिसून आला. त्यांनी तत्काळ कणकवली पोलिसांना माहिती दिल्यानंतर पोलिसांनी घटनास्थळी धाव घेतली. या घटनेनंतर संपूर्ण कणकवली तालुक्यात भीतीचे आणि चर्चेचे वातावरण निर्माण झाले आहे. प्राथमिक पाहणीत दळवी यांच्या डोक्याला गंभीर स्वरूपाची जखम असल्याचे दिसून आले. ही जखम गोळी लागल्यामुळे झाली असावी, असा प्राथमिक अंदाज व्यक्त केला जात आहे. घटनास्थळाजवळ काही अंतरावर रक्ताचे डागही आढळले असून, त्यामुळे हा प्रकार अपघाती नसून घातपाताचा असण्याची शक्यता अधिक बळावत आहे. मात्र, मृत्यूचे नेमके कारण अद्याप स्पष्ट झालेले नाही. घटनेची माहिती मिळताच पोलिसांनी परिसराचा ताबा घेत पंचनामा सुरू केला. तपासाच्या दृष्टीने तज्ज्ञ पथकाला पाचारण करण्यात आले असून, घटनास्थळावरील पुरावे बारकाईने गोळा करण्यात येत आहेत. मृतदेहाची स्थिती आणि परिसरातील परिस्थिती लक्षात घेता तपास यंत्रणा सर्व शक्यता तपासत आहे.
दरम्यान, सुशांत दळवी हे कणकवलीतील परिचित बांधकाम व्यावसायिक असल्याने त्यांच्या अचानक झालेल्या मृत्यूमुळे मोठी खळबळ निर्माण झाली आहे. त्यांच्या व्यावसायिक व्यवहारांचा, संपर्कातील व्यक्तींचा तसेच अलीकडील घडामोडींचा सखोल तपास पोलिसांकडून सुरू आहे. परिसरातील निरीक्षण कॅमेर्‍यांची नोंदही तपासली जात असून, संशयास्पद हालचालींचा मागोवा घेतला जात आहे. स्थानिकांकडून हा प्रकार जुन्या वैमनस्यातून घडला असावा, अशी शक्यता व्यक्त केली जात आहे. मध्यरात्रीनंतर ही घटना घडली असावी, असा प्राथमिक अंदाज वर्तवला जात आहे. शवविच्छेदन अहवालानंतर मृत्यूचे नेमके कारण स्पष्ट होणार असून, या प्रकरणातील सत्य लवकरच समोर येण्याची शक्यता व्यक्त केली जात आहे.