खरातला ’शिजूका’ अन् ’नॉडी’ कोडवर्डने यायचे फोन; अंजली दमानिया यांचा पुन्हा गंभीर आरोप

मुंबई : नाशिक परिसरात वादाच्या भोवर्‍यात सापडलेल्या भोंदूबाबा अशोक खरात याच्या कारवायांबाबत नवे धक्कादायक तपशील समोर येत आहेत. तपास यंत्रणांनी उभारलेला फास अधिक घट्ट होत असतानाच, सामाजिक कार्यकर्त्या अंजली दमानिया यांनी खरातच्या दूरध्वनी संपर्कांविषयी केलेल्या खुलाशांमुळे प्रकरणाला नवे वळण मिळाले आहे. दमानिया यांनी माध्यमांशी बोलताना सांगितले की, खरातच्या दूरध्वनी नोंदींचा अभ्यास करताना काही क्रमांक संशयास्पद पद्धतीने नोंदवलेले आढळले. या क्रमांकांवर ‘शिजूका’ आणि ‘नॉडी’ अशी कोडनावे वापरली जात असल्याचे लक्षात आले. या नावांमागे नेमके कोण आहेत, याचा शोध घेणे अत्यंत महत्त्वाचे असून, ही संपूर्ण यंत्रणा एखाद्या मोठ्या जाळ्याचा भाग असण्याची शक्यता त्यांनी व्यक्त केली.
तपास अधिकार्‍यांच्या मते, अशा कोडनावांचा वापर हा साधारणपणे ओळख लपवण्यासाठी केला जातो. त्यामुळे खरातच्या संपर्कात असलेल्या व्यक्तींची ओळख पटवणे आणि त्यामागील उद्देश समजून घेणे, हे तपासातील पुढचे महत्त्वाचे पाऊल ठरणार आहे. शिर्डी पोलीस ठाण्यात फसवणुकीचा गुन्हा नोंद झाल्यानंतर खरातची पत्नी कल्पना खरात ही मागील दहा दिवसांपासून बेपत्ता आहे. ती अचानक घर सोडून गेल्याने तपास यंत्रणांपुढे नवे आव्हान उभे राहिले आहे. पोलीस तिचा शोध घेण्यासाठी नातेवाईक, परिचित तसेच संभाव्य संपर्कांच्या ठिकाणी चौकशी करत आहेत. मात्र, अद्याप तिचा ठावठिकाणा लागलेला नाही. तपास अधिकार्‍यांनी तिच्या हालचालींचा मागोवा घेण्यासाठी विविध तांत्रिक साधनांचा वापर सुरू केला आहे. तपासात आणखी एक महत्त्वाचा मुद्दा पुढे आला आहे. खरातने पुणे, शिर्डी आणि नाशिकनंतर सोलापूर जिल्ह्यातही मोठ्या प्रमाणावर मालमत्ता खरेदी केल्याचे उघड झाले आहे. उत्तर सोलापूर तालुक्यातील कळमण गावात सुमारे अकरा एकरांहून अधिक जमीन त्याच्या नावावर नोंदवण्यात आली आहे. या व्यवहाराची नोंद मार्च 2024 मध्ये झाली असून, सुमारे दोन कोटी चाळीस लाख रुपयांचा हा सौदा असल्याची माहिती समोर आली आहे. या व्यवहारात पत्नीला सर्वाधिकार देण्यात आले असल्याचेही नोंदीवरून स्पष्ट होते. विशेष म्हणजे, ज्या भागात जमीन दर साधारण पाच ते सहा लाख रुपये प्रति एकर इतका आहे, त्या ठिकाणी खरातने वीस लाख रुपयांहून अधिक दराने जमीन खरेदी केल्याचे दिसते. या व्यवहारामुळे संभाव्य आर्थिक अनियमिततेबाबत संशय अधिक गडद झाला आहे. संबंधित भागातून प्रस्तावित शक्तीपीठ महामार्ग जाणार असल्याने भविष्यातील दरवाढ लक्षात घेऊन ही गुंतवणूक केली गेल्याची शक्यता व्यक्त केली जात आहे.

तपासाचा फास अधिक आवळण्याची चिन्हे
एकूणच, कोडनावे वापरून झालेले संपर्क, पत्नीचे बेपत्ता होणे आणि संशयास्पद मालमत्ता व्यवहार या तिन्ही बाबी एकमेकांशी जोडलेल्या असण्याची शक्यता नाकारता येत नाही. तपास यंत्रणा आता या सर्व धाग्यांना जोडून व्यापक चौकशी करत आहेत. या प्रकरणातील पुढील उलगडे अधिक मोठ्या घोटाळ्याकडे निर्देश करतात का, याकडे राज्यभराचे लक्ष लागले आहे.