डिझेल नाही म्हणून रुग्णवाहिका नाकारली; वेळेत उपचार न मिळाल्याने निष्पाप बाळाचा पोटातच मृत्यू!

एकीकडे सरकार ‘सुलभ प्रसूती’ आणि ‘माता-बाल संगोपना’साठी कोट्यवधी रुपयांच्या जाहिराती करतं. मात्र, दुसरीकडे ग्रामीण भागातील सरकारी यंत्रणेचा निर्घृण आणि लाजीरवाणा चेहरा पुन्हा एकदा समोर आला आहे. हिंगोली जिल्ह्यातून एक अशी धक्कादायक आणि मन सुन्न करणारी बातमी समोर आली आहे, जी ऐकून तुमचाही थरकाप उडेल. केवळ एका रुग्णवाहिकेला डिझेल नव्हतं… हो, तुम्ही बरोबर ऐकलंत, फक्त डिझेल नसल्याचं कारण देत एका गरोदर मातेला रुग्णवाहिका नाकारण्यात आली आणि याच हलगर्जीपणामुळे एका निष्पाप बाळाचा जन्माच्या आधीच, म्हणजे आईच्या पोटातच मृत्यू झाला आहे.
ही दुर्दैवी घटना घडली आहे हिंगोली जिल्ह्यातील औंढा नागनाथ तालुक्यातील जवळा बाजार येथे. येथील प्राथमिक आरोग्य केंद्रात एका गरोदर महिलेला प्रसूती कळा येऊ लागल्याने नातेवाईकांनी तात्काळ सरकारी रुग्णवाहिकेची मागणी केली होती. मात्र, तिथल्या प्रशासनाने “रुग्णवाहिकेत डिझेल नाही” असं सांगून हात वर केले.
वेळ हाताबाहेर जात होती, वेदना वाढत होत्या. अखेर हतबल झालेल्या नातेवाईकांनी खाजगी वाहनाची व्यवस्था केली आणि त्या मातेला हिंगोलीच्या शासकीय रुग्णालयात दाखल केलं. मात्र, या सर्व धावपळीत आणि खाजगी वाहन शोधण्यात मोठा वेळ वाया गेला. रुग्णालयात पोहोचायला उशीर झाल्याने, डॉक्टरांनी तपासणी अंती सांगितलं की, आईच्या पोटातच बाळाचा मृत्यू झाला आहे.

नातेवाईकांचा संताप आणि प्रशासनाचा ढिसाळपणा:
या घटनेनंतर मृत बाळाच्या नातेवाईकांनी आणि स्थानिक नागरिकांनी रुग्णालयात प्रचंड संताप व्यक्त केला आहे. “जर वेळेवर सरकारी रुग्णवाहिका मिळाली असती, तर आज आमचं बाळ जिवंत असतं,” अशी आर्त हाक आणि प्रतिक्रिया रुग्णाच्या नातेवाईकांनी दिली आहे. जवळा बाजार प्राथमिक आरोग्य केंद्राच्या या ढिसाळ कारभारामुळे एका हसत्या-खेळत्या कुटुंबावर दुःखाचा डोंगर कोसळला आहे.
हा केवळ हलगर्जीपणा नाही, तर एका निष्पाप जिवाचा बळी आहे! डिझेलचे पैसे सरकारकडून वेळेवर मिळत नाहीत का? की आरोग्य केंद्रातील अधिकारी मुद्दाम याकडे दुर्लक्ष करत आहेत? या निष्पाप बाळाच्या मृत्यूला जबाबदार असणाऱ्या दोषी डॉक्टरांवर आणि प्रशासनावर कडक कारवाई होणार का? हाच मोठा प्रश्न आता उपस्थित होत आहे.