श्रीगोंदा वकील संघाच्या अध्यक्षपदी ऍड. शिंदे; इधाटे उपाध्यक्ष

श्रीगोंदा : श्रीगोंदा वकील संघाच्या सन 2026-27 या वर्षासाठी झालेल्या वार्षिक निवडणुकीत बिनविरोध निवडींसह चुरशीच्या लढतीतून नव्या कार्यकारिणीची निवड करण्यात आली. निवडणूक प्रक्रिया शांत, शिस्तबद्ध आणि उत्साहपूर्ण वातावरणात पार पडली असून संघातील एकजूट आणि लोकशाही मूल्यांचे दर्शन घडले.

या निवडणुकीत अध्यक्षपदी ऍड. जयंत बापूराव शिंदे यांची बिनविरोध निवड झाली. त्यांच्या निवडीमुळे संघाच्या नेतृत्वात स्थैर्य आणि अनुभवाची जोड मिळाल्याची भावना सदस्यांनी व्यक्त केली. महिला उपाध्यक्षपदी  ऍड.  विजया जाधव (घोडके) यांची, तर महिला सचिव तथा ग्रंथपालपदी  ऍड. सविता आसवले (भिसे) यांचीही बिनविरोध निवड होऊन महिला प्रतिनिधित्वाला भक्कम संधी मिळाली आहे.

दरम्यान, इतर पदांसाठी झालेल्या निवडणुकीत सदस्यांनी मतदानाद्वारे आपला कौल दिला. त्यानुसार उपाध्यक्षपदी  ऍड.  संपत रंगनाथ इधाटे, सचिवपदी  ऍड.  संदीप सातपुते, तसेच खजिनदारपदी  ऍड. राजन नहार हे बहुमताने विजयी झाले. या चुरशीच्या लढतींमुळे निवडणुकीत चैतन्यपूर्ण वातावरण निर्माण झाले होते.

निवडणूक प्रक्रिया यशस्वीरीत्या पार पाडण्यासाठी निवडणूक निर्णय अधिकारी म्हणून  ऍड. अशोकराव रोडे यांनी जबाबदारी सांभाळली, तर सहाय्यक निवडणूक निर्णय अधिकारी म्हणून ऍड. अक्षय सुपेकर यांनी मोलाची साथ दिली. 

निवडून आलेल्या सर्व पदाधिकाऱ्यांचे व सदस्यांचे वकील संघाच्या वतीने मनःपूर्वक अभिनंदन करण्यात आले. नव्या कार्यकारिणीकडून संघटनेच्या कामकाजात अधिक गती, पारदर्शकता आणि समन्वय साधला जाईल, तसेच वकिलांच्या हितासाठी ठोस निर्णय घेतले जातील, असा विश्वास व्यक्त करण्यात आला.

श्रीगोंदा वकील संघ नव्या नेतृत्वाखाली अधिक सक्षम, प्रभावी आणि गतिमान होईल, अशी अपेक्षा सर्व स्तरातून व्यक्त होत आहे.