आसूड मोर्चातील अनुपस्थितीमुळे राजकीय चर्चांना उधाण; जवळगावकरांच्या पुढील भूमिकेकडे लक्ष

नांदेड: काँग्रेसच्या नेतृत्वाखाली नुकतीच नांदेड येथे आयोजित करण्यात आलेल्या ‘आसूड मोर्चा’नंतर हदगाव विधानसभा मतदारसंघातील राजकीय वातावरण चांगलेच ढवळून निघाले आहे. या मोर्च्यात हदगावचे माजी आमदार माधवराव पाटील जवळगावकर अनुपस्थित राहिल्याने त्यांच्या पुढील राजकीय वाटचालीबाबत विविध चर्चांना उधाण आले आहे. आगामी काळात ते कोणती भूमिका घेणार, याकडे कार्यकर्ते, राजकीय निरीक्षक आणि विविध पक्षांच्या नेत्यांचे लक्ष लागले आहे.

माधवराव पाटील जवळगावकर हे हदगाव मतदारसंघातील एक प्रभावी नेतृत्व म्हणून ओळखले जातात. अनेक वर्षे त्यांनी मतदारसंघात सक्रिय राजकारण करत आपला स्वतंत्र जनाधार निर्माण केला आहे. त्यामुळे त्यांच्या प्रत्येक राजकीय हालचालीची राजकीय वर्तुळात मोठी चर्चा होत असते. आसूड मोर्च्यातील त्यांची अनुपस्थिती ही केवळ योगायोग नसून त्यामागे काही महत्त्वाचे राजकीय संकेत असल्याची चर्चा आता रंगू लागली आहे.

लवकरच होणार कार्यकर्त्यांची बैठक

सूत्रांच्या माहितीनुसार, येत्या काही दिवसांत हदगाव येथे जवळगावकर यांच्या प्रमुख उपस्थितीत कार्यकर्त्यांची एक महत्त्वाची बैठक आयोजित करण्यात येणार आहे. या बैठकीत ते आपल्या समर्थकांशी थेट संवाद साधून भविष्यातील राजकीय दिशा स्पष्ट करू शकतात, अशी दाट शक्यता वर्तवली जात आहे. त्यामुळे या बैठकीकडे आता संपूर्ण मतदारसंघाचे डोळे लागले आहेत.

दरम्यान, राज्यातील सध्याच्या बदलत्या राजकीय परिस्थितीच्या पार्श्वभूमीवर अनेक नेते आणि कार्यकर्ते नव्या राजकीय पर्यायांचा विचार करत असल्याचे चित्र आहे. अशा परिस्थितीत जवळगावकर यांच्या पुढील निर्णयाला विशेष महत्त्व प्राप्त झाले आहे. विविध राजकीय पक्षांकडून त्यांच्याशी संपर्क साधला जात असल्याच्या चर्चा सुरू असल्या तरी, त्यांनी अद्याप कोणतीही अधिकृत भूमिका जाहीर केलेली नाही. हदगाव विधानसभा मतदारसंघातील आगामी राजकीय घडामोडींवर जवळगावकर यांच्या निर्णयाचा मोठा परिणाम होण्याची शक्यता व्यक्त केली जात असून, येत्या काही दिवसांत हदगावच्या राजकारणात मोठे फेरबदल पाहायला मिळू शकतात.