रक्ताच्या नात्याला काळिमा; नराधम बाप, मामा आणि भावाकडून ५ वर्षांपासून चिमुकलीवर अत्याचार!

माणुसकीला काळिमा फासणारी आणि रक्ताच्या नात्याला लज्जित करणारी एक अत्यंत धक्कादायक घटना कोल्हापुरातून समोर आली आहे. ज्या पित्याने मुलीचे रक्षण करायचे, त्याच जन्मदात्या पित्यासह मामा आणि मामेभावाने एका अल्पवयीन मुलीवर गेल्या पाच वर्षांपासून अत्याचार केल्याचे उघड झाले आहे. या घटनेमुळे संपूर्ण महाराष्ट्र सुन्न झाला आहे.
कोल्हापूरच्या शाहूपुरी परिसरात ही संतापजनक घटना घडली आहे. पीडित मुलगी जेव्हा केवळ लहान होती, तेव्हापासून नराधम बाप, मामा आणि अल्पवयीन मामेभावाने तिचा शारीरिक छळ सुरू केला होता. घराच्या चार भिंतींच्या आत चाललेला हा अत्याचार गेल्या पाच वर्षांपासून सुरू होता.
वारंवार होणाऱ्या या नराधम कृत्याला पीडिता कंटाळली होती. अखेर, सहनशक्तीचा अंत झाल्यावर तिने आपल्या आईला सर्व आपबिती सांगितली. पोटच्या गोळ्यासोबत घडलेला हा क्रूर प्रकार ऐकून आईच्या पायाखालची जमीनच सरकली. या माऊलीने कोणताही विलंब न लावता थेट शाहूपुरी पोलीस ठाणे गाठले आणि या नराधमांविरुद्ध तक्रार दिली.