आ.सत्यजित तांबे यांचा फ्लेक्स मधून होणारे विद्रूपिकरण थांबवण्यासाठी पुढाकार ; स्वतःचे फ्लेक्स काढले

संगमनेर ( प्रतिनिधी ) काँग्रेसच्या राष्ट्रीय वर्किंग कमिटीचे सदस्य तथा मा.महसूलमंत्री बाळासाहेब थोरात यांच्या नेतृत्वाखाली समृद्ध,विकसित आणि वैभवशाली असलेल्या संगमनेर शहरात काही दिवसापासून सुरू असलेल्या फ्लेक्सबाजीने विद्रूपिकरण झाले. मात्र स्वच्छ व सुंदर संगमनेर ही संकल्पना ठळक करण्यासाठी आमदार सत्यजित तांबे यांनी पुढाकार घेतला असून फ्लेक्सच्या माध्यमातून होणारे विद्रूपकरण थांबवण्यासाठी नगरपालिका मुख्याधिकारी यांना निवेदन दिले आहे. तर कार्यकर्त्यांनी लावलेले स्वतःचे फ्लेक्स काढून त्यांनी एक चांगला पायंडा घातला आहे.

मा.महसूल मंत्री बाळासाहेब थोरात यांच्या मार्गदर्शनाखाली संगमनेर शहर व तालुक्यात हा सहकार, शिक्षण, ग्रामीण विकास, शेती, व्यापार यासाठी राज्याला दिशादर्शक ठरला आहे. संगमनेर मध्ये अनेक ऐतिहासिक व पायाभूत विकासाच्या सुविधा त्यांनी राबविल्या असून विविध वैभवशाली इमारतींबरोबर विमानतळासारखे संगमनेर हायटेक बसस्थानक निर्माण केले आहे.  याचबरोबर इंजीनियरिंग कॉलेज ते संगमनेर बसस्थानक हा हॅपी हायवे शहराचे आकर्षण बनला आहे.

मात्र मागील काही दिवसांपासून संगमनेर शहरात अनेक कार्यकर्त्यांनी फ्लेक्स लावले असून बसस्थानकासह इंजिनिअरिंग कॉलेज रोड व परिसरात विद्रुपीकरण केले आहे. हे सर्व अनाधिकृत फ्लेक्स तातडीने काढले जावे याकरता आमदार सत्यजित तांबे यांनी एक संगमनेरकर म्हणून पुढाकार घेत नगर परिषदेला निवेदन दिले आहे. याचबरोबर स्वतःचे कार्यकर्त्यांनी लावलेले फ्लेक्स काढले आहेत.

या निवेदनात त्यांनी म्हटले आहे की, संगमनेर हे केवळ शहर नाही. तर ती आपली संस्कृती व ओळख आहे. अत्यंत गुण्यागोविंदाने नांदणाऱ्या जनतेचे हे घर आहे. 1991 मध्ये डॉ. सुधीर तांबे यांनी नगराध्यक्ष म्हणून शहराचे नेतृत्व करत शांतता निर्माण केली. याचबरोबर लोकनेते बाळासाहेब थोरात यांनी संगमनेर शहरात सातत्याने विविध विकासाच्या योजना राबवून शहराला वैभवशाली बनवले.सौ.दुर्गाताई तांबे यांनी स्वच्छ व सुंदर संगमनेर बनवण्यासाठी सातत्यपूर्ण प्रयत्न केले. एक विकसित शांत सुरक्षित आणि विश्वासार्त असलेले शहर म्हणून संगमनेरचा लौकिक निर्माण झाला.

मात्र मागील काही दिवसांपासून संगमनेरमध्ये खूप फ्लेक्स बाजी होत आहे. आपल्या लाडक्या संगमनेर शहरात अवैध फ्लेक्स चा सर्वत्र सुळसुळाट झाला आहे. राजकीय कार्यकर्ता म्हणून नाईलाजाने मलाही कधीकधी या स्पर्धेत उतरावे लागले. परंतु तमाम संगमनेर करांच्या भावना लक्षात घेऊन हे सर्व फ्लेक्स तातडीने काढावे ही विनंती आहे. शहराच्या दर्शनी भागात, चौकात, बस स्थानक, मोठ मोठ्या इमारती,एवढेच काय तर मंदिर व धार्मिक स्थळांचे सौंदर्य सुद्धा या फ्लेक्समुळे झाकाळून गेले आहे. कमानींवर कमानी फ्लेक्स वर फ्लेक्स लावून सर्वत्र गोंधळ निर्माण केला आहे. यातून राजकीय वाद व तणाव वाढत असून फ्लेक्स फाडण्याचे प्रकार सुद्धा सुरू झाला आहे. त्यामुळे कायदा व सुव्यवस्थेचा प्रश्न निर्माण झाला आहे. शांत व सुसंस्कृत वातावरण बिघडत चालले आहे.

त्यामुळे संगमनेर शहराला पुन्हा एकदा चांगले वैभव प्राप्त करून देण्यासाठी सर्वांनी फ्लेक्स काढून टाकावे. याचबरोबर मी स्वतः तात्काळ माझ्या स्वतःचे सर्व फ्लेक्स काढून टाकत असून प्रशासनाने तातडीने सर्व अनाधिकृत फ्लेक्स काढावे व स्वच्छ सुंदर व सर्वांना अभिमान वाटावा असे शहर बनवण्यासाठी पुढाकार घ्यावा असे आवाहनही त्यांनी केले आहे. फ्लेक्स मधून संगमनेर शहराला मुक्ती देण्यासाठी केलेल्या पाठपुरावाबद्दल तमाम संगमनेरकरवासीयांनी आमदार सत्यजित तांबे यांचे अभिनंदन केले आहे. याबाबत विविध माध्यमांनी ही अनेक वेळा आवाज उठवला होता.

माजीमंत्री बाळासाहेब थोरात यांनीही काढले होते स्वतःचे फ्लेक्स

संगमनेर हायटेक बस स्थानक पूर्ण केल्यानंतर अनेक कार्यकर्त्यांनी संगमनेर बस स्थानक परिसरामध्ये फ्लेक्स लावले. यावर तत्कालीन महसूलमंत्री व प्रदेशाध्यक्ष असणारे लोकनेते बाळासाहेब थोरात यांनी स्वतःउतरून सर्व स्वतःचे फ्लेक्स काढून टाकण्याच्या सूचना दिल्या व बसस्थानक परिसर अत्यंत मोकळा व स्वच्छ केला. हा उपक्रम राज्यभर कौतुक होऊन इतरांसाठी दिशादर्शक ठरला होता. याच धर्तीवर आमदार सत्यजित तांबे यांनी सुद्धा स्वतःचे सर्व फ्लेक्स काढून इतर कार्यकर्त्यांपुढे आदर्श निर्माण केला आहे.