काँग्रेस कार्यकर्त्यांसाठी मोठी संधी!बीड जिल्हा पदाधिकार्‍यांच्या निवडींना वेग; इच्छुकांना अर्ज करण्याचे आवाहन

केज : बीड जिल्ह्यातील काँग्रेस संघटना अधिक मजबूत व सक्षम करण्यासाठी पक्षश्रेष्ठींकडून संघटनात्मक पातळीवर हालचालींना वेग देण्यात आला असून, विविध विभाग व सेलच्या पदाधिकार्‍यांच्या निवडी प्रक्रिया अधिकृतपणे सुरू करण्यात आली आहे. महाराष्ट्र प्रदेश काँग्रेस कमिटीच्या मार्गदर्शनाखाली ही प्रक्रिया राबविण्यात येत असून, इच्छुक व सक्रिय कार्यकर्त्यांसाठी ही मोठी संधी मानली जात आहे.
या पार्श्वभूमीवर बीड जिल्हा काँग्रेसचे अध्यक्ष राहुल सोनवणे यांनी इच्छुक कार्यकर्त्यांना आवाहन करताना सांगितले की, पक्षाला तळागाळात अधिक बळकटी देण्यासाठी अनुभवी, कार्यक्षम आणि निष्ठावान कार्यकर्त्यांना संघटनेत संधी दिली जाणार आहे. त्यामुळे इच्छुकांनी आपले अर्ज सादर करून या प्रक्रियेत सक्रिय सहभाग नोंदवावा. निवड प्रक्रियेसाठी प्रदेश काँग्रेस कमिटीचे समन्वयक व निरीक्षक म्हणून माजी आमदार एम. एम. शेख, विद्याताई पाटील आणि सुरेंद्रजी घोडजकर यांची नियुक्ती करण्यात आली आहे. त्यांच्या उपस्थितीत जिल्हा स्तरावर निवड प्रक्रिया पार पडणार असून पारदर्शक आणि गुणवत्ता आधारित निवड होणार असल्याचे सांगण्यात आले आहे. या निवडीमध्ये जिल्हा, तालुका आणि शहराध्यक्ष पदांसह युवक काँग्रेस, एनएसयूआय, महिला काँग्रेस, सेवा दल, अनुसूचित जाती-जमाती (अनुसूचित जाती/जमाती), ओबीसी, अल्पसंख्याक, व्हीजेएनटी तसेच सोशल मीडिया सेल यांसारख्या विविध घटकांच्या अध्यक्षांची निवड केली जाणार आहे. त्यामुळे संघटनेतील सर्वच स्तरांवर नव्या नेतृत्वाला संधी मिळणार आहे. इच्छुक उमेदवारांनी आपला सविस्तर बायोडेटा, पक्षातील कामाचा अनुभव, शैक्षणिक माहिती आणि संपर्क तपशील यांचा समावेश असलेला अर्ज विहित नमुन्यात तयार करून जिल्हा उपाध्यक्ष प्रवीण कुमार शेप यांच्याकडे सादर करावा. अर्ज प्रत्यक्षरित्या किंवा पीडीएफ स्वरूपातही सादर करण्याची सुविधा उपलब्ध करून देण्यात आली आहे. दरम्यान, पक्षाच्या या निर्णयामुळे जिल्ह्यातील कार्यकर्त्यांमध्ये उत्साहाचे वातावरण निर्माण झाले असून, अनेक इच्छुक पदांसाठी तयारीला लागल्याचे चित्र दिसत आहे. आगामी निवडणुकांच्या पार्श्वभूमीवर संघटन मजबूत करण्यासाठी ही प्रक्रिया महत्त्वाची ठरणार असल्याचेही पक्षातील वरिष्ठांकडून सांगण्यात येत आहे. अधिक माहितीसाठी इच्छुकांनी 9423472109 किंवा 8805255055 या क्रमांकांवर संपर्क साधावा, असे आवाहनही करण्यात आले आहे.