निर्धार करिअर अकॅडमीच्या शिरपेचात मानाचा तुरा! कृष्णा डोंगरेची राज्यस्तरीय ॲथलेटिक्स स्पर्धेसाठी निवड

शिरूर कासार : निर्धार करिअर अकॅडमी, शिरूर कासार येथील विद्यार्थी कृष्णा डोंगरे याने अंबाजोगाई येथे झालेल्या जिल्हास्तरीय मैदानी स्पर्धेत उल्लेखनीय कामगिरी करत 3000 मीटर धावण्याच्या स्पर्धेत द्वितीय क्रमांक पटकावला. या दमदार कामगिरीच्या जोरावर त्याची राज्यस्तरीय ॲथलेटिक्स स्पर्धेसाठी निवड झाली आहे. अंबाजोगाई येथे रविवारी झालेल्या जिल्हास्तरीय मैदानी स्पर्धेत विविध क्रीडा प्रकारांमध्ये खेळाडूंनी सहभाग घेतला. 3000 मीटर धावण्याच्या स्पर्धेत कृष्णाने सुरुवातीपासूनच वेग, संयम आणि सातत्य राखत उत्कृष्ट कामगिरी केली. अंतिम फेरीत त्याने द्वितीय क्रमांक मिळवत राज्यस्तरीय स्पर्धेसाठी पात्रता मिळवली. कृष्णाच्या यशामागे कठोर मेहनत, नियमित सराव, आत्मविश्वास आणि जिंकण्याची जिद्द यांचा मोठा वाटा आहे. विद्यार्थ्यांच्या शैक्षणिक गुणवत्तेसोबतच क्रीडा क्षेत्रातील कौशल्यालाही प्रोत्साहन देण्याची निर्धार करिअर अकॅडमीची भूमिका या यशातून अधोरेखित झाली आहे. कृष्णा डोंगरेची राज्यस्तरीय ॲथलेटिक्स स्पर्धेसाठी झालेली निवड हा निर्धार करिअर अकॅडमीच्या क्रीडा क्षेत्रातील पहिला मानाचा बहुमान ठरला आहे. या यशामुळे अकॅडमीचे विद्यार्थी, शिक्षक आणि पालकांमध्ये आनंदाचे वातावरण आहे. कृष्णाच्या यशाबद्दल निर्धार करिअर अकॅडमीच्या संचालिका डॉ. अर्चना आघाव नागरे, अध्यक्ष डॉ. प्रदीप आघाव, डॉ. अशोक घोळवे तसेच सर्व कर्मचारीवर्गाच्या वतीने त्याचे अभिनंदन करण्यात आले. मेहनत, जिद्द आणि निर्धाराला योग्य दिशेची जोड मिळाल्यास यश निश्चित मिळते, हे कृष्णा डोंगरेने आपल्या कामगिरीतून सिद्ध केले आहे. त्याचे हे यश अकॅडमीतील इतर विद्यार्थ्यांसाठीही प्रेरणादायी ठरत आहे. राज्यस्तरीय स्पर्धेतही कृष्णाने आपली चमकदार कामगिरी कायम ठेवत निर्धार करिअर अकॅडमीसह शिरूर कासारचे नाव उज्ज्वल करावे, यासाठी त्याला सर्व स्तरांतून शुभेच्छा देण्यात येत आहेत.