संभाजीनगरमध्ये प्रेमप्रकरणातून तरुणीची भरदिवसा हत्या

छत्रपती संभाजीनगर : छत्रपती संभाजीनगर जिल्ह्यातील करमाड परिसरात एका प्रेमप्रकरणातून झालेल्या वादातून धक्कादायक हत्याकांडाची .घटना समोर आली आहे. छत्रपती संभाजीनगर–जालना महामार्गावरील शिवसमर्थ पेट्रोल पंपावर काम करणाऱ्या २७ वर्षीय पूजा सुदाम गावंडे या तरुणीचा तिच्याच प्रियकराने भरदिवसा गळा चिरून निर्घृण खून केला. गुरुवारी दुपारी १२:३० वाजेच्या सुमारास घडलेल्या या घटनेने परिसरात मोठी खळबळ उडाली आहे.
प्राथमिक माहितीनुसार, पूजा आणि सत्यम यांच्यात प्रेमसंबंध होते. मात्र, गेल्या काही दिवसांपासून त्यांच्यात वाद सुरू असल्याची चर्चा आहे. याच वादातून सत्यमने हे टोकाचे पाऊल उचलल्याचा संशय व्यक्त केला आहे. घटनेची माहिती मिळताच करमाड पोलिसांनी घटनास्थळी धाव घेऊन पंचनामा केला. आरोपी सत्यम गावंडे याला पोलिसांनी ताब्यात घेतले असून, अधिक तपास सुरू आहे.
हे संपूर्ण हत्याकांड पेट्रोल पंपावरील सीसीटीव्ही कॅमेऱ्यात कैद झाले आहे. व्हिडीओमध्ये आरोपी अत्यंत क्रूरपणे हल्ला करताना दिसत असून, घटनेनंतर परिसरात एकच पळापळ झाली. भरदिवसा आणि गजबजलेल्या महामार्गावरील पंपावर ही घटना घडल्याने नागरिकांमध्ये भीतीचे वातावरण पसरले आहे.