इराणच्या युद्धात हुथी बंडखोर सहभागी; येमेनमधून इस्रायलवर केला क्षेपणास्त्र हल्ला

तेहरान : मध्यपूर्वेतील तणावपूर्ण परिस्थिती अधिकच चिघळत असून, इराण-इस्रायल संघर्षाच्या पार्श्‍वभूमीवर आता येमेनमधील हुथी बंडखोरांच्या संभाव्य सहभागामुळे युद्धाचा व्याप वाढण्याची चिन्हे दिसू लागली आहेत. संघर्षाच्या सुमारे अठ्ठावीसाव्या दिवशी, दक्षिण इस्रायलमधील भागांना लक्ष्य करत दूर अंतरावरून क्षेपणास्त्र डागण्यात आल्याची माहिती समोर आली आहे.
यासंदर्भात अधिक माहिती अशी की, येमेनमधून सुमारे दोन हजार किलोमीटर अंतर पार करत एक बॅलिस्टिक क्षेपणास्त्र दक्षिण इस्रायलच्या बेअरशेबा शहराकडे डागण्यात आले. हल्ल्याची चाहूल लागताच इस्रायलच्या हवाई संरक्षण यंत्रणांनी तत्काळ प्रतिसाद देत हे क्षेपणास्त्र हवेतच निष्प्रभ केले. त्यामुळे कोणतीही जीवितहानी झाली नसल्याचे सांगितले जात आहे. मात्र, या घटनेमुळे संघर्षाचे स्वरूप अधिक गंभीर होण्याची भीती व्यक्त केली जात आहे. या हल्ल्याची अधिकृत जबाबदारी हुथी बंडखोरांनी अद्याप स्वीकारलेली नसली, तरी इस्रायली लष्कराने या कारवाईमागे येमेनमधील गटांचा सहभाग असल्याचा दावा केला आहे. गाझा संघर्षानंतर यापूर्वीही हुथींनी समुद्री मार्गांवरील इस्रायली जहाजांना लक्ष्य केले होते. त्यानंतर काही काळ शांतता दिसून आली होती; मात्र आता पुन्हा हालचाली सुरू झाल्याचे संकेत मिळत आहेत.
संयुक्त अरब अमिरातीतील अबू धाबी येथे रोखण्यात आलेल्या क्षेपणास्त्रांच्या अवशेषांमुळे अपघाती घटना घडली. शहरातील औद्योगिक परिसरात मलबा पडून दोन ठिकाणी आग लागल्याची माहिती देण्यात आली. या घटनेत पाच भारतीय नागरिक जखमी झाले असून, त्यांच्यावर उपचार सुरू आहेत. आपत्कालीन पथकांनी तातडीने घटनास्थळी पोहोचून आग आटोक्यात आणली. विशेष म्हणजे, हुथी बंडखोरांनी काही तासांपूर्वीच इशारा देत सांगितले होते की, त्यांच्या सहयोगी देशांविरुद्ध कोणतीही लष्करी कारवाई झाल्यास किंवा लाल समुद्रातील मार्गांचा वापर त्यांच्याविरोधात केल्यास ते प्रत्यक्ष हस्तक्षेप करू शकतात. या पार्श्‍वभूमीवर झालेला हा हल्ला अत्यंत महत्त्वाचा मानला जात आहे. तज्ज्ञांच्या मते, जर हुथी बंडखोर उघडपणे या संघर्षात उतरले, तर संपूर्ण मध्यपूर्व प्रदेशात अस्थिरता वाढू शकते. यापूर्वीही त्यांनी सौदी अरेबिया व संयुक्त अरब अमिरातीतील तेलसाठे आणि महत्त्वाच्या पायाभूत सुविधांवर हल्ले केले होते. त्यामुळे समुद्री व्यापार मार्ग आणि ऊर्जा पुरवठ्यावर त्यांचा परिणाम होण्याची भीती आहे. याच दरम्यान, लेबनॉन सीमेजवळ इस्रायल आणि हिजबुल्लाह यांच्यातील तणावही वाढताना दिसत आहे. हिजबुल्लाहने इस्रायली लढाऊ विमानावर जमिनीवरून हवेत मारा करणारे क्षेपणास्त्र डागल्याचा दावा केला आहे.