आ.संजय गायकवाडांच्या विधानाशी पक्षाचा संबंध नाही; शिवसेनेने हात झटकले, विधानाचा केला निषेध

मुंबई : बुलडाणा येथील आमदार संजय गायकवाड यांनी केलेल्या वादग्रस्त विधानावरून निर्माण झालेल्या राजकीय वादात सत्ताधारी शिवसेना पक्षाने अधिकृत भूमिका स्पष्ट करत स्वतःला या प्रकरणापासून दूर ठेवले आहे. संबंधित विधान हे गायकवाड यांचे वैयक्तिक मत असून पक्षाचा त्याच्याशी कोणताही संबंध नाही, असे स्पष्ट करण्यात आले आहे. तसेच, सोशल मीडियावर व्हायरल झालेल्या ऑडिओ क्लिपची सत्यताही अद्याप पडताळलेली नसल्याचे पक्षाने म्हटले आहे.
शिवसेनेचे प्रवक्ते प्रकाश महाजन यांनी या प्रकरणावर प्रतिक्रिया देताना सांगितले की, लोकप्रतिनिधी म्हणून बोलताना संयम राखणे अपेक्षित असते. गायकवाड यांनी वापरलेली भाषा अयोग्य असून पक्ष त्यांच्या मतांशी सहमत नाही. कोणत्याही पुस्तकाबाबत प्रतिक्रिया देताना त्यातील आशय समजून घेणे आवश्यक असते; मात्र त्याऐवजी आक्षेपार्ह भाषेचा वापर करणे हे अनुचित असल्याचे त्यांनी नमूद केले. अशा कृतीमुळे पक्ष नेतृत्वावरही विपरीत परिणाम होऊ शकतो, याची जाणीव संबंधितांनी ठेवणे गरजेचे असल्याचे त्यांनी स्पष्ट केले. गायकवाड यांच्यावर पक्षांतर्गत कारवाई होणार का, या प्रश्‍नावर मात्र महाजन यांनी थेट उत्तर देणे टाळले. हा निर्णय पक्ष नेतृत्व, विशेषतः एकनाथ शिंदे घेतील, असे त्यांनी सांगितले. या प्रकरणामुळे राज्यातील राजकीय वातावरण तापले असून विरोधी पक्षांनी सरकारवर टीकेची झोड उठवली आहे. भारतीय राष्ट्रीय काँग्रेस पक्षाने या प्रकरणी मुख्यमंत्री एकनाथ शिंदे यांना पत्र पाठवून संबंधित आमदारावर गुन्हा दाखल करण्याची मागणी केली आहे. लोकप्रतिनिधींकडून अशा प्रकारचे वक्तव्य अस्वीकार्य असल्याचे काँग्रेसने म्हटले आहे. या घटनेमुळे राज्यातील राजकारणात नव्याने वाद निर्माण झाला असून अभिव्यक्ती स्वातंत्र्य, ऐतिहासिक व्यक्तिमत्त्वांबद्दलचा आदर आणि लोकप्रतिनिधींची जबाबदारी या मुद्द्यांवर पुन्हा एकदा चर्चा सुरू झाली आहे.

पक्षांतर्गत विसंगत भूमिका
दरम्यान, शिवसेनेतूनच वेगवेगळ्या प्रतिक्रिया समोर आल्याने संभ्रमाची स्थिती निर्माण झाली आहे. पक्ष नेत्या नीलम गोर्‍हे यांनी सुरुवातीला गायकवाड यांच्या भूमिकेला काही प्रमाणात पाठिंबा दर्शवला होता. त्यांनी मुद्दा योग्य असला तरी तो मांडण्याची पद्धत चुकीची असल्याचे म्हटले होते. मात्र, आता पक्षाने अधिकृतपणे गायकवाड यांच्या विधानापासून अंतर घेतल्याने अंतर्गत मतभेद उघड झाले आहेत.