फिफा विश्‍वचषक स्पर्धेत स्पेन ठरला विश्‍वविजेता11 वर्षांनी कोरले जेतेपदावर नाव ; स्पर्धेत आठही सामन्यात स्पेन राहिला अपराजित

न्यू जर्सी (अमेरिका) : अतिरिक्त वेळेत फेरान टोरेसने केलेल्या गोल्डन गोलच्या जोरावर स्पेनने गतविजेत्या अर्जेंटिनाचा 1-0 असा पराभव करत फिफा विश्‍वचषक 2026 चे विजेतेपद पटकावले. या विजयासह स्पेनने पुरुषांच्या विश्‍वचषकाच्या इतिहासातील आपले दुसरे विजेतेपद मिळवले. यापूर्वी 2010 मध्ये स्पेनने विश्‍वविजेतेपदावर नाव कोरले होते.
स्पर्धेतील आठही सामने अपराजित राहिलेल्या स्पेनने संपूर्ण स्पर्धेत केवळ एकच गोल स्वीकारला. बदली फुटबॉलपटू म्हणून मैदानात उतरलेल्या फेरान टोरेसने 106 व्या मिनिटाला अर्जेंटिनाचा गोलरक्षक एमिलियानो मार्टिनेझला चकवत चेंडू जाळीच्या वरच्या कोपर्‍यात धाडला आणि सामन्याचा निकाल स्पेनच्या बाजूने झुकवला. या पराभवामुळे अर्जेंटिना आणि लिओनेल मेस्सी यांच्या यशस्वी पर्वाचा समारोप झाला. मेस्सीच्या नेतृत्वाखाली अर्जेंटिनाने 2022 चा विश्‍वचषक तसेच 2021 आणि 2024 मधील कोपा अमेरिका स्पर्धांचे विजेतेपद मिळवले होते. मात्र, सलग दुसर्‍या विश्‍वविजेतेपदाचे त्यांचे स्वप्न स्पेनने उद्ध्वस्त केले. बार्सिलोनाचा 19 वर्षीय लॅमिन यामाल याच्यासाठी हे विजेतेपद कारकिर्दीतील सर्वात मोठे यश ठरले. स्पेनने 2010 मध्ये पहिले विश्‍वविजेतेपद जिंकले, तेव्हा तो अवघा तीन वर्षांचा होता. स्पर्धेत त्याने केवळ एक गोल केला असला तरी स्पेनचे यश हे एखाद्या एका खेळाडूपेक्षा संपूर्ण संघाच्या सांघिक खेळीचे फलित ठरले. याआधी युरोपियन अजिंक्यपद स्पर्धेतही यश मिळवलेल्या स्पेनकडे आता युरोप आणि जग या दोन्ही स्तरांवरील सर्वोच्च किताब आहेत. त्यामुळे 2008 ते 2012 या कालावधीत गाजवलेल्या वर्चस्वाची पुनरावृत्ती करण्याची क्षमता या संघात असल्याची चर्चा रंगू लागली आहे.
स्पेनच्या यशामध्ये मध्यफळीतील रॉड्रीने संपूर्ण स्पर्धेत खेळावर प्रभावी नियंत्रण राखले. मिकेल ओयारझाबलने पाच गोल करत स्पर्धेतील अव्वल गोलवीरांमध्ये स्थान मिळवले. तर गोलरक्षक उनाई सायमनने उत्कृष्ट बचावांच्या जोरावर प्रतिष्ठेचा ’गोल्डन ग्लोव्ह’ पुरस्कार पटकावला. फेरान टोरेसने अंतिम सामन्यात गोल करणारा केवळ पाचवा बदली फुटबॉलपटू होण्याचा मान मिळवला. 2014 मध्ये अर्जेंटिनाविरुद्ध जर्मनीसाठी मारिओ गोट्झेने निर्णायक गोल केल्यानंतर अशी कामगिरी करणारा तो पहिलाच फुटबॉलपटू ठरला. तसेच 2010 मध्ये आंद्रेस इनिएस्टानंतर विश्‍वचषकाच्या अंतिम सामन्यात अतिरिक्त वेळेत गोल करणारा बार्सिलोनाचा दुसरा फुटबॉलपटू म्हणूनही त्याची नोंद झाली. स्पेनच्या विजेतेपदाच्या मोहिमेची सुरुवात केप वर्देविरुद्ध गोलरहित बरोबरीने झाली. त्यानंतर सौदी अरेबियावर 4-0, उरुग्वेवर 1-0 असा विजय मिळवत त्यांनी गटात अव्वल स्थान निश्‍चित केले. बाद फेरीत स्पेनने ऑस्ट्रियाचा 3-0, पोर्तुगालचा 1-0, बेल्जियमचा 2-1 आणि फ्रान्सचा 2-0 असा पराभव करून अंतिम फेरी गाठली.

किलियन एम्बाप्पे गोल्डन बूटचा मानकरी
फ्रान्सचा स्टार फॉरवर्ड किलियन एम्बाप्पेने फिफा विश्‍वचषक 2026 मध्ये गोल्डन बूट पुरस्कार जिंकला आहे. कतारमध्ये झालेल्या 2022 च्या विश्‍वचषकानंतर, एम्बाप्पेने सलग दुसर्‍यांदा या स्पर्धेत सर्वाधिक गोल करणारा फुटबॉलपटू होण्याचा मान मिळवला आहे. जरी फ्रान्सचा संघ विजेतेपद जिंकण्यात अपयशी ठरला असला तरी, त्यांच्या कर्णधाराने स्पर्धेत इतर सर्व गोल करणार्‍या फुटबॉलपटूंना मागे टाकत अपवादात्मक कामगिरी केली. गोल्डन बूट पुरस्कार स्पर्धेत सर्वाधिक गोल करणार्‍या फुटबॉलपटूला दिला जातो.